الهامش

فـ حتة بعيدة
فـ الهامش
نخضر زى هيش منسى
وزى الحلف بيحشرج
فـ صوت صافى لطريق مقطوع
نسيتينا
لا بصّيتى بطرف العين
ولا عشمك فـ قلبنا قل
وشايفة البص يكوينا
وفـ قلوبنا عروق تتحل
لا مديتى إيدين تنشل
غريق من يمة التوهة
ولا طبطبتى
على حلم اليتم فـ العيد
على طرف اللسان صرخة
بنكتم فيها وتجرّح ودان الليل
ومين يقدر يزيح الهم ويتأخر
تقيل الشيلة ويحمّل من التجاعيد
وجع طاغى لميزان مختل
ونيل يبكى على صدر النخيل
عطشان
وجنبك قُلّة مليانة من التراتيل
وبين لاتنين سبيل منسى
وليل بيزحزح النسيان
دراعه انشل
وفـ الهامش بنات واقفة
تبيع الحلم ع الناصية
لبدر نوره بيخاتل
وبيجامل بنات أفكارك النايمين
حمام الحلم بيبيت هنا بدرى
وشجر الهامش الفاضى
ميعرفشى لغات تانيين
بيتسند على عكازه ويروّح
ورا العصافير
وفـ الهامش حاجات قلقانة
م التفتيش وم التغيير
وميتة يابوى غناوى الطير
محتاج لورق أو فيش
وجوا الهامش الغامض
كتمنا الخوف ودوسنا عليه جامد
ولجل إنتى ما هتعدى
حلاوة حلمك الوردى
ولا تخافى وتتخضى
فرشنا رمل أحلامنا
وقدمنا فـ قدامنا
وربطنا فـ أقدامنا
وكنا العضم فـ جناحك
وكنا إحنا الزغب والريش
فدوسى علينا وبراحتك
لكين بشويش
لحسن عضمنا بايش
من التهميش