رئيس مجلسى الإدارة والتحرير
د. محمد الباز
رئيس التحرير التنفيذي
محمد العسيري
السبت 15 أغسطس 2020 الموافق 25 ذو الحجة 1441
رئيس مجلسى الإدارة والتحرير
د. محمد الباز
رئيس التحرير التنفيذي
محمد العسيري
مؤمن المحمدي
مؤمن المحمدي

الموضوع وما فيه عن القرن وناديه

الأحد 07/يوليه/2019 - 08:30 م
طباعة

بعد ٢٠٠١، فضلنا كدا إحنا وجماهير الزمالك، هم يقولوا إحنا نادى القرن الحقيقى، وأنا واللى زيى نبحث ونكتب، ونقول والله ما فيه مؤامرة، هى اللوايح كدا، لأ إنتو حرامية وفاسدين، لا إنتو بارانويد ونظرية المؤامرة واكلة دماغكم، لـ حد ما جينا ٢٠١٠.
اللى حصل إنه طلع المعهد الدولى لـ الإحصاء iffhs قال إنه هـ يسمى نادى القرن فى كل القارات، يا عم ما الناس سمت وخلاص، لأ إحنا هـ نسميهم، طيب سموا، عارف حضرتك، ادوا نادى القرن فى إفريقيا لـ مين؟ لـ كوتوكو الغانى.
ليه يا سيدى؟ قال لك إحنا هـ نمشيها بـ النقط على كل حاجة، تكسب فى دور الـ ٣٢ تاخد نقط، فى الـ ١٦ فى الـ ٨.
فى كل خطوة تتحسب لك نقاط، وبـ حسبتهم، كوتوكو الغانى هو نادى القرن فى إفريقيا، وريال مدريد فى أوروبا، والهلال السعودى فى آسيا.
بـ النسبة لـ الاتحاد الإفريقى طنش خالص خالص، كـ إنهم هوا، ولا يعنونا فى شىء، الاتحاد الآسيوى ولع، ورغم تأكيداتهم إنهم رافضين تسمية نادى القرن، مش عارف قال لك بن همام ابتسم لـ بتوع الهلال، يعنى بـ يبارك، يعنى معترف.
اتحاد جدة طلعوا فيها، إن اتحاد جدة هو نادى القرن الحقيقى، وطلعت كمية بيانات واستهجانات من دول كتير، وكانت ملحمة فى آسيا، يمكن لسه شغالة لـ حد دلوقتى.
أوروبا بقى باركت خطوة المعهد الدولى لـ الإحصاء وقالت إنها موافقة على كلامهم، كان ميشيل بلاتينى ساعتها، وقال إنهم راعوا مطالبنا فى التصنيف اللى كان على رأسها، عدم احتساب أى بطولة لا يشرف الويفا على تنظيمها بـ الكامل، يعنى الإنتركونتننتال، اللى هى زى الأفروآسيوى عندنا مش محسوبة.
بس برضه بـ نظام النقاط اللى حطوه، مش عارف بقى أمريكا الجنوبية، وأستراليا وأمريكا الشمالية، كان إيه نظامهم، بـ صراحة كنت تعبت من البحث، إنما دا صحى تانى وتالت حكاية مين نادى القرن الحقيقى، وتستمر الحكايات.
وفى ختام الرحلة السعيدة دى، أحب أفاجأك مفاجأة كبيرة، خلينا بس نتابع سير الأحداث، من بعد ٢٠١٠ لـ حد يومنا هذا، بقت عادة معتادة، كل ما مجلس إدارة الزمالك يتزنق، يقول لك نفتح ملف نادى القرن، يلّا نجمع مستندات.
هو أنا مش عارف مستندات إيه الصراحة، كمان بـ يطالبوا بيها الجمهور، يعنى نتايج المباريات مثلًا، صورة مش كويسة لـ مصطفى فهمى، اعتراف بـ خط إيد عيسى حياتو سايبه مع مشجع فى البدرشين! يعنى إيه مستندات نادى القرن؟
بس ماشى، يالا بينا يا جماعة نفتح الملف، عيسى حياتو مشى، جه أحمد أحمد، يالا يا جماعة أهو عيسى حياتو مشى، نفتح الملف والمرة دى بـ جد، هاتوا المستندات، أحمد أحمد اتقبض عليه، يالا يا جماعة نفتح الملف، هـ يعيدوا ماتش الترجى والوداد، يالا يا جماعة نفتح الملف، مش عارف مين أمه بـ تولد وهـ تجيب له أخ صغنن يالا يا جماعة نفتح الملف.
كل مرة يقولوا إنهم اتقدموا بـ ملف ضخم لـ الكاف، فيه كل مستندات نادى القرن، المفاجأة يا إخوانى إنه ولا مرة.. ولا مرة، ولا مرة يعنى ولا مرة الزمالك اتقدم بـ أى حاجة لـ أى حتة فيما يخص نادى القرن لا الكاف ولا الفيفا ولا الأمم المتحدة.. ليه؟
علشان بـ بساطة شديدة، هم عارفين اللى فيها وعارفين كويس كويس إنه كان فيه معايير متوافق عليها والمعايير دى معمول بيها حتى وقتنا هذا، ولا يجرؤ مجرد فتح الكلام فى الموضوع، إنما أهو، كل ما تتزنق نفتح الملف.
وكل قرن وإنتو طيبين.