محمد المعتصم يكتب: يوميات رمضان (21)

* بعيدا عن السبب الحقيقي للأزمة أعتقد أن "الشيخ" هيشوف له " حارة " تانية قريب يعمل فيها الشويتين بتوعه
* "كريزي تاكسي" فكرة عظيمة انتهت بالاستسهال.. كان من الممكن أن تكون عفوية مع أشخاص عاديين لكن للأسف ظهور عدد من الكومبارس أفسد الفكرة
* ستوديو 9090 استضاف الاعلامي مفيد فوزي.. طبيعة مفيد انه بيحب يسأل ويحط علامات استفام حتى في وسط كلامة.. وده بيخليك محتاج مذيع بمواصفات خاصة يحاوره.. مذيع من نوعية محمود الفقي
* امبارح د حسام موافي " جابر خواطر الغلابة" كان في برنامج المواجهة على قناة اكسترا نيوز مع ريهام السهلي.. البرنامج ده مش واخد حقه بصراحة.. لأني اكتشفت وانا بقلب في يوتيوب انهم عاملين لقاءات مع بنت يوسف السباعي وحفيده والشيخ الطبلاوي وفريدة الزمر وايناس جوهر.. ريهام عاملة شغل كويس والبرنامج حلو
* فيه خبر بيقول ان المخرج يفرض السرية على الحلقة الأخيرة من مسلسل "لآخر نفس".. اللي هو أساسا المسلسل نفسه ما حدش واخد باله منه علشان نفرض على نهايته السرية.. وده خبر يشبه احتفال مي عز الدين بنجاحها التاريخي في البرنسيسة بيسة وبيأكد اننا عايشين في حتة تانية.
* شخصية «اللواء جلال خطاب» واحدة من أفضل الشخصيات التى قدمها أحمد عبد العزيز.
* ظهور سوسن بدر كضيفة شرف فى مسلسل "هوجان" مع محمد امام درس في طريقة اختيار وظهور ضيوف الشرف التى أصبحت موضة سخيفة.. أي كلمتين وهات صاحبنا النجم يشيل حلقتين تلاتة
* أقوال مأثورة
- حط السلاح على راسك وموت بيه روحك.. الكلمة اللي بتطلع من بق عايدة ما برتجعش تاني
- حرام عليكي يا ست الكل انا عندي عيال
- في عنيا.. موت انت نفسك وما تشيلش هم
( حنان مطاوع - لمس اكتاف )
* محمد رمضان قرب يرجع الـ300 متر بتوع والده ومجلس نقابة الصحفيين لسه مش عارف يشكل هيئة المكتب

* الاستاذ عيسي مدرس نموذجي يرفض الدروس الخصوصية، يشرح بضمير في الحصة، يبسط لهم الافكار ولديه طريقة محبية لجذب الانتباه خلال الشرح... لا مانع ان يشرح مادة اخري للتلاميذ، ظروفه صعبه لكنه نموذج لمدرس لا يبيع علمه مهما كانت ظروفه صعبة.. هو بس ممكن يقتل ويسرق ويتاجر في المخدرات.. قال يبيع ضميره ويدي دروس خصوصية مستحيل
*اغرب ما قاله احمد السقا في ولد الغلابة وهو يحدث (رشوان): انت ما تعرفش انا مين انا اسمي عيسي اسأل عليا مطاريد الجبل..
حد يفكر الاستاذ انه بيعمل دور عيسي مدرس التاريخ مش منصور الحفني

* قارن حلقة رامز جلال مع رايا ابي راشد وحلقته مع أحمد فتحي لتعرف اننا دايما بنيجي على الغلابة.
* برنامج الهداف على نجوم ال ام تجربة كويسة لميدو في الراديو بعد تجارية في الفضائيات.. ميدو كان عامل حلقة عن اجمل أهداف محمود الخطيب وكواليس اللقاءات اللي جمعتهم مع بعض.. وبكدة ميدو ضمن انه مش هيعتب نادي الزمالك ولا حتى ضيف ( ده عامل حلقة عن الخطيب واحنا بنلعب نهائي الكونفدرالية يا بيه )

دعاء اليوم: اللهم عليك بمن يكرهوننا دون سبب ومن يحقد علينا دون أن نفعل له شيئ