رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

محمد المعتصم يكتب: يوميات رمضان (16)

جريدة الدستور

- كل حلقة تظهر فيها منى عبد الغني في مسلسل زلزال أتأكد أن من أقنعها باعتزال الفن يستحق جايزة الدولة التقديرية
- اختيار هنادي مهني لتكون ابنة مني عبد الغني اختيار موفق.. واختيار محمود حجازي ليكون خطيبها اكتر من موفق.. ماهو لازم الحاجات اللي شبه بعض تلم على بعضها
- اكتر المشاهد المحببة لي في مسلسل زلزال تلك التى يظهر فيها أحمد صيام أو سامي عبد الحليم. وياسلام لو الاتنين مع بعض في مشهد تبقى اتعشت
- حوالي 3 مشاهد قدمهم ماجد المصري في فيلم كلمني شكرا صنعت اسطورة لم تكتمل اسمها " صلاح معارك"، خاصة مع الايفيه الخالد لعمرو عبد الجليل " احنا اسفين يا صلاح ".. الاسطورة دي خرجت منها كل أدوار شبيحة السينما فيما بعد وبينها التى قدمها محمد رمضان.. هذا العام يعود ماجد المصري بشخصية خليل بيه في مسلسل زلزال.. ربنا يستر والشخصية ما تكملش معانا السنين اللي جاية في كل المسلسلات.
- زي النهاردة من سنة كنا بنودع " الحاج صالح" في مسلسل نسر الصعيد.. وقولناله السلام أمانة لـ" رفاعي الدسوقي" واللي مات السنة اللي قبلها في نفس التوقيت تقريبا.. قنبلة ابداع
- حلقة واحدة من برنامج اسم من مصر للاعلامي اللبناني جورج قرداحي توازي جميع حلقات شيخ الحارة من بداية عرضه وحتى يتوقف أحمد سعد عن الزواج والمشاحنات مع زوجاته.. يعني بعد عمر طويل
- رغم اني ما حبتش نهاية "مروان أبو المكارم" في قمر هادي الا أني هفتقد تمثيل الموهوب "حمزة العيلي".. مشهد وفاته متصور حلو بعد ما أقنعه محمد عزمي انه يدخل يصلي.. فدخل واعترض أحد المصلين لانه سكران والامام تدخل وقام صلي ومات في السجود.. الفكرة رغم انها مستهلكة واتحكت مليون مرة قبل كده لكن اخراجها عظيم وأداء حمزة العيلي فيها عالي قوي
- بغض النظر عن دعوات " اللهم احسن ختامنا" اللي سمعتها من ناس جنبي بتتفرج على مسلسل قمر هادي فانا هفتقد تمثيل حمزة العيلي في "قمر هادي".. لكن اداء هاني سلامة في المسلسل ده يستحق انه شخصيا يتوقف قصاده علشان ما يرجعش خطوة.. هاني متميز السنة دي في الاداء
- اللي يعرف والدة حمادة هلال يقولها تدعيلنا ع الفطار.. دعواتها سبب في ان ابنها يمثل وهو ما بيعرفش يمثل ويفتح بيوت ناس من اللي بتشتغل معاه وهم لا حول لهم ولا قوة
- دويتو "عشمى فى ربنا" لأحمد شيبة وإيهاب توفيق حلو، خاصة الجزء اللي ايهاب بينصح فيه شيبه:" لو لقيت الناس تملي يعظمولك، فوق لنفسك كدابين مهما يقولولك، اوعي تنزل بحرهم واسأل مجرب لو غرقت هيسبيوك واقف بطولك" تحس الكلام طالع من قلبه
الاجمل بقى رد شيبة:" الزهر لو يوم لعب مستني يوم منه ممكن في لحظة يهزني ويقل بيا " تحس انه طالع من واحد الدنيا قلبته ع الجنبين.. الاغنية حلوة
- شريف الدسوقي في لمس اكتاف عامل دور يخلينا نتكسف من نفسنا على تجاهله السنين اللي فاتت
- مش بس البنك "المميكن".. فيه حاجات كتير في حياتك مميكنه بس انت اللي مش لاقي "شربيني " تصرخ في وشه
- فتحي عبد الوهاب عامل دور عظيم في "لمس اكتاف"
فتحي عبد الوهاب عامل دور عظيم في "لاخر نفس "
في الحالتين عندنا نفس الممثل ونفس الاداء لكن في الوقت اللي شاهد الجميع المسلسل الاول.. لم يشعر أحد بوجوده في الثاني.. ولا وجود المسلسل أصلا.
- مفتقد برنامج الصدمة السنة دي. كان من البرامج اللي لازم اشوفها يوميا.. للأسف الحاجات الحلوة بتختفي لصالح الحاجات التافهة
- حضرتك كممثل لو شايف ان الفن عيب ومضيعة وقت وعايز الجمهور ما يتفرجش علي حاجة في شهر رمضان بما فيهم أعمالك ويركز في العبادات ممكن توفر الفلوس اللي بتاخدها واللي بيصرفها المسلسل بتاعك وتقعد في البيت الشهر ده.. ولا الفن وحش بس فلوسه حلوة..
- أخيرا اعترف المنتخب أن لاعب النادي الأهلي وليد سليمان يحمل الجنسية المصرية ويستحق المشاركة مع منتخب بلاده مثل الاستاذ مروان محسن.. دعواتنا لحارس المرمي العملاق محمد عواد أن يحصل عليها قريبا
- اغرب شيء في قائمة المنتخب لكأس الامم الافريقية هو رمضان صبحي.. رمضان كان في المنتخب اثناء وجوده على الدكة في لندن والان وهو لاعب اساسي في مصر يتم استبعاده.. وعلى ذكر المستبعدين فيه لاعب كويس اسمه عبدالله جمعه بعيد عن المنتخب وفيه شقيقه صالح جمعه لو فيه أزمة في العدد ممكن اختيار عبد الله وهيقوم بفرقة كاملة
- باستثناء محمد صلاح الذي يستطيع صنع الفارق في لحظات.. قائمة المنتخب لا يمكنها الوصول للمباراة النهائية لكاس الامم.. دي لو وصلت أول صلاح سالم يبقى تمام

- أقوال مأثورة: "أنا عندي منطق في لبسي.. لو عريان من فوق ميبقاش عريان من تحت" ناهد السباعي عن الفساتين التى ترتديها في المهرجانات

- دعاء اليوم: اللهم امنحهم ضعف ما يتمنوه لنا.

نشوفكم بكرة