مراد ناجح عزيز: بحاول ما أتكعبلش فيهم

بتحبّها؟
أنا كمان بحبّها وأكتر
وروحى متشعلقة فيها..
زى سباط البلح ف النخل..
زى ورقة بيضة كل شوقها..
ف كلمتين حلوين..
ف قصيدة رومانسية سقف بيتها عالى
الكل شايف جماله
وبيتأمّله
بتعمل لها إيه تانى وأنا أعمله؟
أبويا سابنى كبير بس دايمًا من غيره
بحس إن السكة طويلة
وخطوتى أتقل من زمان
فُتّك ف الكلام..
أنا بلكونتى صغيّرة
على قد أحلامى..
اللى عايشين معايا وحواليا
زى ضلّى
وبحاول ما أتكعبلش فيهم وأنا ماشى
وبحاول ما أقلش لحد غيرها (حبيبى)
علشان تفضل لوحدها..
لما يشرق ع الكون جمالها
أسيب كل اللى ف إيديا وأجرى..
ألمّ الأكل البايت ع الترابيزة
وأرتّب الأوض
وكأنه حد عزيز عليّه جاى بعد غيبة سنين
وأنا طالع أستقبله
- بتعمل لها إيه تانى وأنا أعمله؟