أسامة قاسم يذكر بالتاريخ الأسود للإخوان ويدعو للمشاركة في تعديلات الدستور

كشف الإعلامي أسامة قاسم عن التاريخ الأسود لجماعة الإخوان في مستهل برنامجه "في الصميم" المذاع على قناة صوت العرب، حيث ألقى الضوء على الجرائم التي ارتكبتها الجماعة الإرهابية خلال نظام الرئيس المعزول محمد مرسي، وتذكير الجمهور بخيانة الجماعة بمعاونة قطر وتركيا.

وقال "قاسم" في مقدمة برنامجه: "فاكرين لما قطر كانت عايزة تشتري قناة السويس بمسمى الصكوك الإسلامية.. ولما الأزهر اعترض ولعوا الدنيا بحوادث التسمم في المدينة الجامعية للأزهر.. فاكرين لما قطر كانت عاوزة تأجر آثار مصر عشان تسرقهم بمائة مليار دولار لمدة ثلاثين سنة.. فاكرين لما العريان كان عاوز اليهود يرجعوا مصر.. فاكرين لما مرسي كان عاوز يدي حلايب وشلاتين للسودان".

وأضاف: "فاكرين لما كان هيدي سيناء للفلسطينيين والإرهاب.. فاكرين لما قال وايه يعنى لما يموت الآلاف عشان الباقى يعيش، طبعًا كان يقصد أي معارض.. فاكرين الإعلان الديكتاتوري اياه واللى حصل عند الاتحادية للمعارضين.. فاكرين الجنود اللى اتقتلوا غدر وهما بيفطرو عشان يقيل المجلس العسكري وطنطاوى.. فاكرين لما البنزين كان بالطوابير عشان يتهرب لغزة.. فاكرين لما الكهربا كانت بتقطع بالأيام.. فاكرين لما قتلوا الناس عند مكتب الإرشاد.. فاكرين لما الدقون طلعت تبجح فى الناس وأصواتهم عليت، فاكرين عزيزي بريز؟ بعد ما كانوا بيقولوا أبناء القردة والخنازير وعلى القدس طلعين".

وتابع "قاسم": "فاكرين لما عذبوا الناس فوق مسجد عمر مكرم وشركة السياحة فى التحرير.. فاكرين لما كل واحد باع اللى حلته عشان يشتري سلاح يحمى عائلته وركبنا شبابيك وأبواب حديد وعشنا فى زنازين تحت مسمي بيوت.. فاكرين مين كان بيرمي الشباب فى التهلكة فى محمد محمود وجري على الانتخابات وتاجر.. فاكرين مين قال ان مرسي ابو الانبياء والمرسلين بما فيهم الرسول.. فاكرين مين اللى عمل اجتماع سري مذاع على الهواء وفضحنا وادى فرصه لاثيويبا تتبجح علينا وتمسك علينا غلطة فى موضوع سد النهضه.. فاكرين رئيس مصر لما قطعوا عليه الكلمة فى مؤتمر القمة الافريقية ووقفوا فى اخر الصف فى التقاط الصورة التذكرية وبعتوا واحدة بشنطة خضار تستقبله.. فاكرين رئيس مصر لما راح روسيا وراح استقبله رئيس وحدة محليه وراح يشتري سلاح للإرهاب".

وتابع: "فاكرين لما امريكا اتمسكت بالاخوان ومرسي، طب ليه عشان عدوهم ولا عميل؟.. فاكرين لما فضحنا فى المانيا و"دونت ميكس" فاكرين لما فتح البلد لتركيا وصادرتها تمر فى ارضنا مجانًا.. فاكرين قرض صندوق النقد لما كان حلال وقتا.. فاكرين لما افتتح مصنع مكرون مقام بقاله 5 سنين.. فاكرين اكذوبة "طائر النهضة" اللى له رأس ومؤخره وطلع فنكوش.. فاكرين اللى جاب ايران مصر ونجاد ورفع علامة انصر لأنه فى مصر".

واختتم "قاسم" فاكرين فاكرين فاكرين.. لقتكم مش فاكرين فقولت افكركم ببعض الذكريات الهباب، عشان لو حد حاول يحبطكم ويبث اشاعاته تدوه بالجزمة القديمة ده لو انتوا لسه واعيين للمؤامرة اصلا، لو لسه حضرتك من الناس اللى فاكرين الايام السود دي انزل وشارك فى التعديلات الدستورية وافرح ببلدك اللى لسه صامدة وقوية وملاذ لكل الاوطان العربية.. الاوطان اللى ضاعت".