آدم منزلش من الجنة

س وج
أنا وانتى بعد التحقيقات والسين وجيم
وتحريات أمن المشاعر والكماين واللجان
كل الأدلة أثبتت إن إحنا ماشيين ف السليم
وإن انتى ساكنة حياتى مهما اتغير الناس والمكان
استغربوا العشاق من الكيميا اللى بين وردك ووردى
إزاى بحسك واكشفك رغم المسافة
وإزاى عيونك فارقتك واتعلقت ع الحيطة عندى
وسكنتى من غير انتخاب عرش الخلافة
يا أميرة كل الشعب قدملك فروض الطاعة لكن
أنا جبتلك ١٠٠ ألف ناقة وألف حارس
وسكنت علشان أكسبك كل الأماكن
وحاربت علشان ألمحك ١٠٠ ألف فارس

قلبك إنسان
خد بالك جدًا من قلبك
احضنه جامد
هاتله هدايا
اعزمه على حاجة ف أى مكان
قلبك إنسان
فاتعود دايمًا تقسم إحساسك بالنص
صدقنى عيون قلبك هتبص
وهتشوف الحزن بدالك
فياريت فعلًا تاخد بالك
قلبك مش شارع كل الناس تقدر تمشيه
قلبك هيشاور ع إللى يقدر تعبك فيه
وساعتها هتبقى انت وقلبك واللى اختارهالك
شىء واحد
فاحضنه جامد
هاتله هدايا
اعزمه على حاجة ف أى مكان
قلبك إنسان

البحر دوت كوم
البحر أصلًا كان مجرد أرض فاضية الخوف ماليها
والناس فى عز الحزن كانوا بيبكوا فيها
وواحدة واحدة الدمع زاد
والناس عيونها اتعودت
متسيبش صناديق دمعها فى كل البلاد
الأرض دى كانت بتقدر تسحب الخوف والقلق
وفى عز أمواج الهموم مكانتش تسمح بالغرق
الدمع جمَّع نفسه على هيئة عريس
واستنى أول دمعة نزلت من إيزيس
علشان يفض بكارة الأرض الحزينة
ويعدى على موجة شرفها بـ١٠٠ سفينة
واتشقت الأرض احتفالًا بالعروسة
ومكنش فرعون السبب ولا زهد موسى
لكن دموع المجروحين هى اللى دفعت مهرها
هى اللى كتبت عقد تعمير بحرها
ومضت عليها بأهدى خط
علشان كده بنرتاح قوى
وبننسى أحزاننا قوى.. على أى شط