القاهرة : الإثنين 27 مايو 2019
محمد الباز رئيس مجلسى الإدارة و التحرير
محمد العسيري رئيس التحرير التنفيذي
الثقافة
السبت 16/فبراير/2019 - 07:09 م

أحجار على رقعة الشطرنج

أحجار على رقعة الشطرنج
فوزى سعيد
dostor.org/2520064


على رقعة الشطرنج
فيل بيجرى
وحصان عاملّى زنبلك
وطابية كافرة بكل شىء
إلا الملك
ووزير عظيم واقف
وفارد سطوته
مين اللى قال المملكة
وسية ملك حضرته
مين اللى قال؟!

مين اللى قال
إن الملك عايش بعيد فى عزلته
مين اللى قال؟!
وأنا...... عسكرى
كبيرى خطوة للأمام
ولو جريت ينكسر حلمى أوام
ولو صرخت ينكتم صوتى بلجام

فى ألف إيد اتحركت إلا أنا
وألف كلمة اتصدقت إلا أنا
لو يوم حلمت بالهنا
بلاقى مية مليون قنا
ساعات أخطى وساعات أوطى
وأسمع كلام زى السهام
أسكت وعدى....
دايمًا بعافر رغم الظروف
لا عمرى شكيت الألم..
ولا عمرى حد ملانى خوف
لكن مكانى عسكرى
ودا مش بإيدى
خلقت كى لا أعترض
أمرك يا سيدى

عاش الملك.. يحيا الملك
هتاف ورج المعركة
ومعطيات المسألة
حبة عساكر
واقفين على طاقة أمل
من غير تذاكر

يااااارقعة الشطرنج
ياصبر أيوبك
تمن عساكر بس
بيداروا فى عيوبك
تمن عساكر بس
بيرقعوا فى ثوبك
تمن عساكر بس
خاضعين لأسلوبك

يالّى رسمت الخطة
لحظة بقى اسمعنى
مش معنى إنى ضعيف
إنك هتمنعنى
أوصل لآخر أرض
على رقعة الشطرنج

ads
ads
ads