اشتياق

ملعون أبوه الاشتياق
ملعونة أحلام الغلابة ع الطريق وقت الفراق
والواد بيرسم ع الرصيف كنبة وسرير
وحروف كتير متنطورة
تكتب هزايمه قصاد عنيها مصورة
وتسيب معاه الهدمتين
والباقى من رزق الهموم
ويشيل ف غُلبه كل يوم
منديل يا بيه
والدمعة تنزل من عنيه
يمسح ب كُمه دمعته
ف يلم كام ضلع انكسر
ويطاطى راسه يهزها
أفكار تعاكسه ما تراضيه
منديل يا بيه
أنا كنت ف المشهد ب اعاند دونكيشوت
كومبارس صامت ف الجراح
مخرج يصمم كل شوت
يعيده ليه..؟
منديل يا بيه
أسوأ ما ف الناس الدموع
وأحسن ما فيهم مش نبى
مش آخر اللى يروح بلاش
ولا أول المتاعيس غبى
شاف من حبيبته كتير صدود
دوامة دايرة وبتناديه
مناديل يا بيه
ف يسيب دموعه ع الرصيف
لو حزنه راق
ملعون أبوه الاشتياق.