يا جمالو يا جمالو.. الشيف شربيني: "أطبخ في البرامج آه.. البيت لأ"
ينافس مذيعى «التوك شو» فى نسب المشاهدة، يلتف حول برنامجه الأطفال رغم أنه ليس فيلم كارتون، اسمه علامة مسجلة فى عالم برامج الطبخ رغم تمسكه بالأكلات الشرقية التقليدية وسط ثقافة الأكل الغربى السائدة.
فى استديو «سى بى سى سفرة» التقيناه فى حوار دسم مثل أكلاته، ملىء بالضحكات عكس شخصيته الجادة على الشاشة، والعصبية أحيانا أخرى، فى السطور التالية نقدم لكم وجبة من الحوار الشهى والطازج مع الشيف شربينى، كما لم تعرفه من قبل.
■ بصراحة.. مقدم برامج الطبخ الناجح هل بالضرورة يكون شيف شاطر ولا هى مجرد كاريزما إعلامية؟
- بصراحة معادلة صعبة جدًا، أى شيف قبل ما يطلع على أى قناة بيعملوله «إنترفيو» طبخ الأول، وكمان بيتأكدوا من إنه ليه طلّة حلوة، لأنه بيطلع على الشاشة مابيشتغلش فى مطبخ مطعم. بس للأسف دلوقتى موضوع الكاريزما بقى أكتر وفيه شيفات شاطرين جدًا فى الأكل قعدوا فى البيت ومكملوش عشان مكلوش مع الناس، وبقى على الساحة دلوقتى برامج طبخ نُص لِبّة واستعراض أكتر ما هو طبخ فعلًا.
■ هل ده سبب مثلا إن الشيفات يلجأوا لإفيهات زى «يا جمالو يا جمالو» و«يا تكّاتو يا حركاتو» والحاجات دى؟
- هى إفيهات بتعلّق مع الناس، بتربط المذيع أكتر بالمشاهد. زى «كلمتين وبس» و«ساعة لقلبك»، حاجة بتعمل شخصية للشيف.
■ جملتك المشهورة «ورقة وقلم واكتبى ورايا يا ست الكل» كنت قاصد بيها إيه؟
- الستات نسّاية بطبعها، هى بتتفرج وهتقولك لما آجى أطبخ هفتكر وبعدين بتعك الدنيا فى الآخر، فعشان كده بقولها «اكتبى عشان ماتنسيش»، ودلوقتى بقول «صوّرى المقادير من على الشاشة».
■ ناس كتير بيفتكروا إن اسمك شربينى وميعرفوش إنه عبدالسميع؟
- شربينى ده لقب طبعًا بس اتعودت من صغرى إن اسمى شربينى، وأبويا بيندهوا عليه يقولولو «شربينى»، حتى علاء بينادوه «شربينى»، إنما أنا اسمى عبدالسميع محمد على الشربينى.
■ بمناسبة والدك وعلاء، وبما إنهم همّا الاتنين طبّاخين وإنت طباخ.. هل الطبخ وراثة؟
- ابن الوز عوّام، والطفل بيطلع يلاقى أبوه واقف فى المطبخ وناجح وشاطر وبيشرب الصنعة منه.
■ بالمناسبة.. الطبخ دراسة ولا صنعة؟
- الطبخ مرمطة فى المطبخ. فيه فرق بين الكاريير والكار، الكاريير بيدرّس إنما الكار صنعة. وأنا بقابل خريجين سياحة وفنادق وماسكين مراكز عالية بس ميعرفش يعمل طبق رز بلبن.
■ عايز تقول إن الأكل محتاج «نَفَس»؟
- ده أساسى، لازم يبقى فيه روح. أنا زمان كانت أمى تقولى «هات لحمة من الجزار ده تحديدا»، أسألها «ليه» تقولى «الجزار ده نَفَسه حلو وسكينته حلوة»، وقيس على كده أى حد بيبيع أى حاجة راضى عنها وبيديك الحاجة بحب بتبقى طعمها أحلى. الجزار النضيف هو اللى يقطّع القطعة تبقى كيلو بالظبط أو ممكن يقل منها ما يزودش إنما البخيل دايما القطعة بتاعته ناقصة ويِفضل يقطّع ويحط ويكمل الميزان.
النَفَس ضرورى من أول ما بتشترى الحاجة لحد ما تطبخها بحب، عشان تطلع حلوة.
■ وإنت حبيت الطبخ عشان تمارسه؟
- يا بيه أنا اتمرمطت، أنا عشان أدرس الطبخ فى أوروبا كنت بغسل صحون وأمسح البلاط عشان أوفر تمن الدراسة، لحد ما رجعت هنا اشتغلت فى فنادق.
■ مين الشيف اللى مبتحبش تشوف اسمه على الشاشة؟
- مقدرش أقول اسم محدد، بس أى شيف بيضلل الناس، يدخّل الحاجة الفرن ويطلعها بعد دقيقة جاهزة.
■ هل عمر حاجة باظت منك على الهوا؟
- كتير، حاجات شاطت وحاجات باظت، عادى إحنا بنى آدمين. فاكر مرة كنا أنا وشريف مدكور على الهوا وعامل ريش ضانى بورق العنب فى بريكس، ولسه بحطه على النار قام مكسور واعترفت على الهوا إن الأكلة باظت.
■ طيب وفرضًا إن الشيف معرفش يظبط تسوية الأكل مع وقت الحلقة؟
- هى دى الفكاكة بتاعة الشيف وشطارته، أى طبخة فى العالم - غير الكوارع والحاجات الشادة- مابتخدش أكتر من نص ساعة. لو عندى تلات أطباق على الهوا بختار الطبق اللى هياخد وقت أطول أبدأ بيه، وبعدين الطبق الأقل فى الوقت وبعدين الأقل بحيث يستووا بالترتيب والتدريج.
■ النضارات والأطقم الملونة اللى بتلبسها.. فكرتك؟
- فكرتى، رغم إن عيالى اتريقوا عليها أول مرة. أنا بحب فى شغلى دايمًا الألوان، وده اللى معلق الأطفال بيّا. الأطفال بيوقفونى فى الشارع يتصوروا معايا وبيغصبوا على أهاليهم يفتحوا التليفزيون يشوفونى.
■ إيه أكتر أكلة بتطّلب منك؟
- البيتزا والمكرونة البشاميل والبان كيك والتورتاية.
■ أغرب أكلة اتطلبت منك؟
- طاجن عصبان فى الصعيد، معرفهاش.
■ أغرب أكلة دوقتها؟
- لحم التمساح، وكان شهيًا جدًا، وشوربة السلاحف جميلة.
■ هل ممكن تطبخ أكلة إنت مبتحبهاش؟
- أنا بطبخ للناس مش ليّا، ومش لازم أمشِّيهم على ذوقى ومزاجى.
■ لو طالع الفضاء وليك أكلة واحدة بس تاخدها معاك.. تاخد إيه؟
- حلة محشى.
■ مين بيطبخ فى البيت.. إنت ولا المدام؟
- لا الطبخ مهنة، إنما فى البيت مراتى اللى بتطبخ. ومقدرش أقولها الأكل وحش عشان هتتنطط وتقولى «قوم اعمل إنت».
■ بتطلب دليفيرى؟
- مبحبوش ودورى إنى أحاربه. أنا فى حلقة عملت ١١ بيتزا بكيلو دقيق واحد اتكلفوا ١٢٠ جنيهًا بالسمك والفراخ والخضار، ليه نجيبها من برة غالية ومتتاكلشى أساسا، ولو حسبت الوقت فهو يدوب عقبال ما تجيلك تكون عملتها.
■ إيه نصيحتك للبنات اللى بتكره الطبخ؟
- هييجى على دماغها، والعيب مش منها، العيب على أمها.
■ السؤال اللى محير الناس كلها: مين اللى بياكل الأكل فى الاستديو بعد ما الحلقة تخلص؟
- (يضحك) المساعدين وعمال الإكسسوار والإضاءة والمصورين، وأى حد موجود فى اللوكيشن.
