كتالوج الانبساط من وحوش السفر
الامتحانات خلصت وكأس العالم بيشطب ودرجة الحرارة بتزيد كل يوم عن التانى، ولازم تدور على فسحة تانية غير البلكونة والتمشية من أوضة النوم للصالون، الفسحة المرة دى لازم تبقى كلها نعنشة وفرفشة واللى سافروا روسيا يشجعوا فى كأس العالم مش أحسن منك وتقدر تعوض اللى فاتك فى الأيام اللى جاية.. فى السطور الجاية استعنا بأشهر الرحالة المصريين عشان ينقلولك تجاربهم فى السفر.. متكسلش تقرا ومتكسلش تسافر.
أشرف جمال: تسافر تروح فين؟
فيزا وتذكرة وخمسة جنيه = ٦ مليارات إنسان
بالضبط كده ده كل اللى محتاجه عشان تشوف ٦ مليارات إنسان..
الأصعب من الثلاث حاجات اللى فوق هو قرارك إنك تتخلى عن العشرة أشخاص اللى بتشوفهم كل يوم، هما هما، خلاص خد القرار إنك تغير الوشوش وتتعلم وتتعايش مع ثقافات تانية.
تعالى نبسط الموضوع.. محتاجين بس ٥ جنيه تسكن بيهم فى اليوم لو حبيت مثلا تسافر الصين أو ٩ جنيه لو حبيت تسافر الهند.. مش مصدق طبعا خش على اكتر مواقع حجز الفنادق فى العالمbooking واتأكد بنفسك. خلاص وثقت بى واتأكدت بنفسك هنتكلم عن أرخص الدول اللى ممكن تلاقى فيها تذكرة طيران.. تعرف إنك ممكن تسافر الأردن طيران بمتوسط ألف جنيه أغلب أوقات العام على خطوط طيران air cairo أو airarabia طبعا مش هتسبنى أكمل كلامى وهتقولى والفيزا.
طبعا إنت كمصرى ليك ٤٠ دولة حول العالم بدون فيزا وفى دول كمان بفيزا سهلة جدا وبعضهم بفيزا عند الوصول.
محتاج تعرف الحاجات المشتركة تقريبا فى أغلب الدول.. هنقسم دول العالم إلى أربعة تقسيمات؛
دول بدون فيزا زى الأردن، إندونيسيا، ماليزيا، إيران، المالديف دول فيزتها سهلة وده بتطلب غالبا باسبور سارى لمدة ٦ شهور صور شخصية حساب بنكى مش لازم مبلغ معين إثبات إنك شغال أو طالب أو ما شابه
حجز غير مؤكد لتذكرة الطيران والفندق بس كده
زى لبنان، جورجيا، الفلبين، الهند
دول فيزتها متوسطة؛
وده زى دول الاتحاد الأوروبى وأمريكا اللى بتطلب الأوراق السابقة بس بتبقى محتاجة حبة حاجات أكتر تتأكد منها إنك بجد رايح تتفسح وتشوف العالم.
هيبقوا محتاجين شهادة تحركات من مجمع التحرير بكل الدول اللى سافرتها قبل كده.
هيبقوا محتاجين حساب بنكى متوسط مع حركة حساب معقولة لفترة متقلش عن ٦ شهور ومحتاجين مقابلة شخصية أحيانا.
ولازم تحاول تقدم كل الأوراق اللى بتقولهم فيها إنك سائح زى وديعة بنكية، وظيفتك أو مشروعك عن طريق السجل التجارى والبطاقة الضريبية.
دول فيزتها صعبة؛
والدول دى الصعوبة بتاعتها إنك مينفعش تسافرلها إلا بدعوة من مواطن فى البلد ده مع طبعا الأوراق السابقة ودى شركات سياحة كتير جدا بتساعدك فى كده زى روسيا وأرمينيا كل واحد فينا موهوم بدول معينة وبثقافة معينة، سافر وعيش وكون جزء من الثقافة دة، وفر بس ثمن كارت شحن واحد أسبوعيا وسافر واستمتع بالعالم.
شاهندة شكرى: لو مفلس ينفع أسافر؟
الأقرب إلى قلبى سفر التطوع أو السفر بعائد مادى أو خدمة قصاد خدمة، يعنى مثلًا فى منظمات زى «هاف دريم» أو اليونسكو بتعملك إنترفيو ولو اتقبلت تخليك تعمل إنترفيو مع وزارة التعليم، فالدولة اللى رايح ليها وبناء عليه بتسافر تشتغل فى المهنة المطلوبة لوقت محدد وبيعفيك من مصاريف الإقامة والأكل داخل المدرسة كمثال.
فى بعض الدول اللى سافرتها «هوستل» وهو بيت شباب بيخليك تقعد فيه لمدة قصاد إنك تشتغل فيه لفترة منها تشوف البلد ويدخلك دخل مادى تصرف منه.
فى فيتنام اشتغلت مدرسة لغة إنجليزية فى معهد، وكان الراتب اللى باخده بصرفه رحلات، وفى الصين والهند الإقامة مبقتش أغلى حاجة فى السفر، فمثلًا فى سريلانكا قضيت ١٥ يومًا مدفعتش غير ٢٠٠ دولار، الإقامة كانت فوق جبل وساعات بيت فى وسط شجر، فى سكن أهل البلد فى الصين الإقامة فى غرف ع الروف، اليوم بـ١٢ دولار، والهند بـ١٥، وهونج كونج ودى الأغلى ٤٥ دولار، أما فيتنام فببلاش، وفى بعض الأماكن مقابل شغل وفى أماكن بـ٦ دولار، فى ماليزيا ٨ دولار، وإندونيسيا بدولار، وفى لاوس «ودى دولة» بـ ١٢ دولار، وتايلاند ٣ دولار فوق شجرة من أمتع الرحلات.
فى ميانمار «بورما» ببلاش فى بيت أهل القرية، قصاد إنك تعلم أطفال حرفة أو لغة، وبيتوفر لك أكل ومسكن، طب ليه الأسعار دى؟ ده ببساطة لأنى مقعتش فى فندق فايف ستارز.
متعة السفر إنك تعيش زى أهل البلد، تاكل أكلهم وتركب مواصلاتهم، وتشرب شربهم، فى بيوت شباب معروفة بـ«هوستلز» بتتكون من دورين مثلًا أو غرف بنات وغرف ولاد فيها كل ما تتخيله من جنسيات مختلفة، كأنك سافرت ١٠ دول وانت فى مكانك، أهدافكم واحدة، وهو إنكم تتبسطوا أو تتطوعوا، وفى مكان أو استكشاف أماكن جديدة أو طلوع جبال سوا أو حتى شغل بفلوس.
اللى اتعلمته فى السفر كتجارب لا هتتعلمه فى كتب ولا فى مدرسة، إنت بتتعلم تكون سريع البديهة، حاسم فى قراراتك وإنك مسئول عن نفسك مسئولية كاملة، كبنت سولو ترافلر بعد ١٤دولة فى آسيا وإفريقيا حسيت فرقت معايا جدًا حتى فى شخصيتى وطريقة تربيتى لابنى، فكرة التجربة والخطأ والاحتكاك بكل أنواع البشر، فكرة تنشئ ثقافة الاعتماد على نفسك وتقبل الآخر أيًا كان شكله، لونه، جنسيته، دينه.
إللى مسافرش فاته كتير، كل عيوبه بالنسب ليا إنى ببعد عن الناس اللى بحبهم وعن ابنى
حسام مختار: ليه لازم نسافر؟
ناس كتيرة نفسها تبقى مبسوطة فى الدنيا دى. وناس أكتر بتحاول كل يوم تغير من نفسها عشان تعيش حياة سعيدة. بس كل الظروف وكل اللى حواليك مكتفك ومش عارف تغير أى حاجة منه. الحل فى السفر يا إخوانا. هو اللى بيكسر القيود دى كلها وبيخليك إنسان فريش. بيديك فرصة جديدة فى التغيير. بيديك أمل فى الحياة. بيفصلك شوية عن كل اللى حواليك وده مطلوب عشان تاخد نفسك وتعرف تفكر وتخطط لحياتك المتوازنة صح. سافر حتى لو جوه بلدك فى أى مكان رخيص تشم فيه هوا تشوف مناظر جديدة، تقابل ناس جديدة. التغيير مطلوب.
جوزيف فوزي: هو السفر غالى؟
هتقولى سياحة وسفر، يعنى فنادق خمس نجوم ورحلات بيزنس كلاس والذى منه، هقولك فاكس ماحدش معاه فلوس للكلام ده، وهقضيها صور من صفحة السندباد الصغير على الفيس أحسن وأنا قاعد على فوتيه مريح فى بيتنا.
هتقولى طب عملت إيه علشان تسافر أكثر من بلد من غير ما تدفع كتير ومن غير ماتحوش كتير ولا تصرف كتير من مدخراتك اللى شايلها لوقت عوزة. أقولك فى مرة كده وانا قاعد أندب حظى، وأولول وانا شايف الواد ماركو صاحبى الإيطالى مقضيها سياحة وسفر وكان متهيألى إنه ورث مصنع البن اللى فى البرازيل بتاع عمه.
سألت ماركو هو بيعمل إيه علشان يسافر، راح ضحك وقالى فكر خارج الصندوق بالإيطالى طبعًا! قعدت أفكر شوية وبعدين عملت زى أرشميدس بتاع وجدتها! لاقيته يقصد صندوق سياحة الخمس نجوم إنى أطلع براه أنا عاوز أتفسح ياخونا أشوف ناس جديدة ومناظر جديدة أعيش المغامرة، ومن ساعتها بقيت أعرف أخطط لسفريات كتير بتبسط.
أتفرج وارجع لبينا أحكى لأهلى وأصحابى على اللى شوفته وللحقيقة هما فاكرينى ورثت مصنع البن برضه.
السياحة اللى الواد ماركو الطاليانى أبوشنطة على كتفه بيعملها دايمًا سياحة رخيصة تحويشتها على القد، فقلت أشترى شنطة زيه واسميها سياحة الشنطة وفكرتها بسيطة. بشوف البلد اللى عاوز أزورها ولو مالهاش فيزا يبقى تمام أهو أبقى وفرت مصاريف الفيزا. مابحاولش أستعين بأى شىء يكلفنى عمولات أو كوميشنز دايمًا بدور بنفسى.
بيشوى فايز: إزاى تتعامل ف الغربة؟
من المهم جدا إنك تقعد عند أهل البلد علشان هيودوك حتت عمرك ما كنت تفكر إنك تروحها وكمان مش مكتوبة فى الكتب.. علشان كده فى كذا اختيار ممكن تعملهم فى الإقامة:
- من أفضل الحاجات لو ليك أى صاحب أجنبى وحابب إنه يستضيفك يبقى ديه أول بلد تفكر إنك تزورها.
- بعد كده من الاختيارات المفضلة وببلاش، هتخش على الموقع دا
www.hosteltraveljobs.com وتشوفلك شغلانة بلقمتك ونومتك.
- من الاختيارات العظيمة واللى أنا بحبها.. الموقع ده
www.couchsurfing.com تسجل على الموقع دا وتدور على حد يستضيفك ببلاش.. أيوه ببلاش.. فى ناس تسألنى طاب هما هيستفيدوا إيه؟ أقولك أنا: المهم عندهم يقابلوا واحد من أهل البلد اللى عاوزين يعرفوا عنها علشان يعرفوا عن البلد أكتر وكمان يكوّنوا صداقات كتير.. وركز هتلاقى فرص فى تنين بس متكسلش ومتيأسش من أول مرة.. (أنا قعدت عند ناس كتير فى دول مختلفة.. واكل نايم شارب متفسح ببلاش).
- لو معاك قرشين عايز تصرفهم ممكن تحجز من على الموقع دا Www.Booking.com.
المواصلات بين المدن عادة بتبقى غالية علشان كده ممكن تعمل كذا حاجة هتوفرلك جدا فى المصاريف: ممكن تقف على الطريق وتوقف عربية عادى جدا وتوصلك فى طريقه.. وحكاوى للصبح يا معلم. فى أوروبا عندهم حاجة حلوة أوى إنك لو مسافر من بلد لبلد لوحدك ممكن تاخد معاك ناس وتشتروا البنزين، والموقع ده هو اللى ناس بتسجل عليه علشان تدور على ناس يركبوا معاهم العربية أو انت تدور على عربية والموقع آمن جدا يعنى محدش هيسرقك https:www.blablacar.com.
هند سالم: تاخد إيه معاك؟
إيه الحاجات اللى المفروض تبقى فى شنطة السفر؟
سؤال دايمًا مطروح علينا خصوصًا من الناس اللى أول مرة تسافر وبيكونوا قلقانين ينسوا حاجة وهما بيحضروا شنطة سفرهم لأول مرة.. الموضوع بيختلف من مسافر لمسافر.. فى ناس بتحب تسافر خفيفة وفى ناس بتحب تاخد معاها الدولاب كله من باب الاحتياط.. كله يتوقف على شخصية المسافر.
لكن عمومًا فى حاجات أساسية لا غنى عنها لأى مسافر.
أولًا: شنطة الأوراق الشخصية:
ودى أهم حاجة للمسافر وطبعا فيها الباسبور، تذكرة الطيران، الفلوس، الكريديت كارد، تصريح السفر أو الموقف من التجنيد للشباب (لو مش مثبت فى الباسبور)، التصريح الأمنى للدول اللى مطلوب لها تصريح أمنى.
ونخلى بالنا من الشنطة دى كويس جدًا، لأن السرقة والنشل منتشرين فى الأماكن السياحية المزدحمة والمواصلات العامة.
ثانيًا: شنطة السفر يكون فيها:
طبعًا ملابس تتناسب مع جو البلد اللى مسافرينها ومع عدد الأيام (ضرورى نشوف حالة الطقس عشان نتجنب نشيل هدوم ملهاش لازمة) وفى نفس الوقت تكون عملية مش بتحتاج مكواة.
ملابس خروج (تيشرتات، جينز أو اتنين حسب المدة، شرابات، جاكت خفيف لو البلد جوها متقلب).
ملابس للنوم.
ملابس داخلية.
وبلاش ناخد معانا أكتر من اللى محتاجينه عشان تبقى حركتنا سهلة، خصوصًا لو بنستخدم مواصلات عامة.
حذاء رياضى مريح (أو اتنين) ومناسب للمشى الكتير.
مستلزمات العناية الشخصية خصوصًا للناس اللى بتنزل فى هوستلز وبيوت الضيافة، لأن غالبًا مش بيوفروا الحاجات دى (شامبو، صابون، شاور جيل، ماكينة حلاقة، فرشاة ومعجون أسنان، مزيل عرق، مشط شعر، مبرد أو قصافة أظافر، فوطة صغيرة).
ونحاول تبقى العبوات صغيرة عشان متخدش مكان ووزن فى الشنطة.
آخر وأهم حاجة فريش باز أو الشطافة المتنقلة: ناس كتير لما بتسافر لأول مرة بتتصدم إن الحمامات برة مفيهاش شطافات.. أدينا بنقول لك عشان لما تسافر متتفاجئش.. الحمامات برة مفيهاش شطافات.
ولو نسيت حاجة مفيش مشكلة، أى حاجة ممكن تشتريها من البلد المسافر لها.
