المتحدث السابق لنادي ضباط الشرطة لـ"محمد رمضان": البدلة واسعة عليك
علق هشام صالح، المتحدث الرسمي السابق لنادي ضباط شرطة مدينة نصر، على ظهور النجم محمد رمضان بشخصية ضابط شرطة في مسلسل "نسر الصعيد"، الذي يعرض في السباق الرمضاني الحالي.
وقال صالح، عبر "فيس بوك"، "اسوأ من جسّد دور ضابط بوليس في التاريخ، ناقصله بدلة زرقا في أحمر ويبقي سبايدر مان.. دخل ديسكو في شرم الشيخ وهو ظابط وقالهم إنه ظابط وضرب الجاردات كلهم وخرج وراح على الشغل عادي، لا اتحقق معاه ولا حد اشتكاه ولا اتوقف ولا حصله أي حاجة".
وأضاف صالح: "راح يجيب أخطر مسجل في قنا بأربع مخبرين بس، بتوّصلو للناس حاجات غريبة ملهاش علاقة بالواقع، أنا يمكن شفت ظباط بتتخانق إنما مشوفتهمش بيقلعو ملط وبيسرسجو.. اسمع كلامي، أصلها مبتليقش على أي حد، مش عمال على بطال هي، ألبس البدلة اللي على مقاسك".
واختتم صالح حديثه، قائلًا: "على فكرة الموضوع مالوش علاقة إنك كنت بتقدم أفلام مسجلين، أحمد زكي عمل المدمن والهروب وكان الباشا وهو ضابط، وعادل إمام عمل مسجل خطر وسلام ياصاحبي وعمل النمر والأنثى، وأمير كرارة كان ديلر في هروب اضطراري وبقى سليم الأنصاري، الموضوع إنها واسعة عليك".
