رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

رحاب هاني تكتب: حدوتة "لا"

جريدة الدستور

كنت قاعدة مع مجموعة من البشر ففي واحدة قاعدة مع بنتها ذات ال ٨ سنوات ؛ البنت بتقول حاجة معينة قامت مامتها ردت عليها "انتي تقولي طيب وحاضر بس فاهمه ؟"
وبعدين بصتلنا وقالتلهم حاجة ان الطفل يبقى مطيع"!
..
زمان وانا عندي حوالي ٧ سنين اما كنّا ننزل نشتري لَبْس كنت الاقي أمي تسألني "تختاري انهي فستان يا روبي ؟"
كنت أقف اتنح كده واقولها "لا اختاريلي"
تقولي لا اختارى انتى.. ايه اكتر لون بتحبيه ؟
اقولها الأزرق !
تقولي الأزرق يبقى تروحي تقفي هناك ناحية الفساتين الزرقا وتختاري .... كنت اروح أقف بالساعة مثلا وهي تفضل مستنيه وفي الاخر ارجع وانا جايبه تلات فساتين ؛ تقعد تقف معايا تقولي بصي ده ممكن يضايقك من هنا عشان عامل كده وده كذا وده كذا شوفي بقى انتى عايزة انهى واحد فأفكر واختار !
اما كنّا نيجي نأكل كانت طبعا بتأكلني كل حاجة مفيدة بس انا كنت قررت "لا يا ماما انا مابحبش القلقاس ليه احب القلقاس وانا بحب الملوخية"
سؤال منطقي وعميق الصراحة وغالبا هي ماكنش عندها اجابة مقنعة وعليه لا للقلقاس !
..
حضوري المشهد الأول خلا اللمبة نورت ؛
انا اول حاجة اعملها لبنتي ان شاء الله هتكون كلمة "لا" !
مش من باب التمرد و حقوق المرأة والكلام الكبير بتاع جمعيات الروتاري ده -نو ابسلوتلي- بس من باب انها لازم تناقشني لازم تبقى شخصية "لبط" -زي أمها اللي هو انا بعد عمر طويل-
اكيد فيه سن بيكون الاعتماد الأكبر علي الأهل لكن في الحقيقة انا دايما في دماغي المشهد الثاني ؛
امي وهي وخداني لفة شراء الهدوم كنت اما اقولها اختاريلي تقولي "لا" اختارى انتى هو انا اللي هلبس ولا انتي !
..
كانت بتنورلي الطريق ؛ تقولي ايه هيضايقني في اللبس وايه هيريحني بس انا اللي كنت بختار!
امي ساعتها ماكانتش بتخليني اختار لبسي امي كانت بتخلقلي شخصية لها رأي ونظرة!
انا عمري ما هعلم بنتي تقول "حاضر ونعم" من غير فهم او وعي هي بتقولهم ليه وعشان ايه!
فيه فرق شاسع بين انك تربي الطفل انه يكون مؤدب ويفهم والدته من البصة وبين انك تمحي شخصيته في مرحلة مبكرة !
اللي كل يوم بتأكد منه ان الطفل زي لامؤاخذة الإسفنجة بيمتص كل حاجة ، كل كلمة ، حركة ، موقف ويخزنها ويبدأ يكبر ويتعامل على أساسهم !
..
انا كنت كده.. انا اتعلمت من مواقف كتير مريت بيها وانا طفلة ، اتأثرت بحاجات ماكنش لازم أشوفها وحاجات تانيه امي علمتهاني
انا هعلم بنتي تناقشني
وتتجادل وتقولي "ليه ؟"!