جولي فاروق تكتب: هو أنا لي ثمن

هو أنا ليّ ثمن؟؟؟ جملة فكرت فيها كتير حينما صدمتنا إحدى الصديقات بقولها "طول ما أنتى مرخصة نفسك وساكتة متستنيش إن حد يشوف إن ليكي ثمن".

تأملت الجملة في البداية يعني باعتبار إنى مش سلعة، فازاي يكون لي ثمن ؟؟؟
بس الحقيقة بعد تفكير طويل اكتشفت إن معاها حق !!! سعادتك، حزنك، كلامك،سكوتك، رفضك، موافقتك ليهم تمن…

وساعات التمن بيكون قيمته إكبر لما بيرتبط بقراراتنا المصيرية... التمن في الحالة دي بيكون غالي ممكن يغير حياتنا تمامًا رأسًا علي عقب … إنك توافقي علي الارتباط بدون ما تفكري وتتأكدي إنك حتكوني سعيدة بتتدفعي ثمنه … انك تسكتي علي حزنك لغايه ما يتحول الي جبل يفصلك عن الطرف الاخر ليه للاسف ثمن …لما متعبريش عن اللي جواكي وتكتفي بالصمت ليه ثمن…وللاسف الشديد دائمًا انتي اللي هتدفعي الثمن ده لوحدك مش علشان اضعف لأ بس علشان مقدرتيش قيمتك. صح… معرفتيش انك غاليه وان كل لحظه في حياتك لازم تتعاش صح… لانها ببساطه مش بتتعاد تاني!!!
الندم مش بيشفي ولا بيعالج ولا بيمحي علامات الجروح قيمي نفسك دائما بشكل صح علشان انتي تستحقي ده…

اتصلت بي احدي صديقاتي تحكي لي مشكله بينها وبين زوجها وتطلب النصيحه كان ردي عليها هو انتي ليه موافقه علي المهزله دي وكان ردها " ظروفي صعبه ان بعد طلاقي لم اجد من يوافق علي الارتباط بي بعد غير هذا الشخص فوافقت دون شروط ومع تقديم الكثير من التنازلات، لاني ببساطه عايشه في مجتمع ذكوري ومحتاجه اضع في خانه الحاله الاجتماعين متزوجة"!!!
انا لست ضد تنازل احد الطرفين قليلا عن بعض الأشياء في العلاقه لاستمرارها لكن هناك ضوابط تحكم هذه التنازلات حتي لا يشعر اطراف العلاقة بالندم وما اسوء هذا الاحساس… الخساره للاسف بتمون كبيره مش لازم تكون خساره مادية فقط ولكن الاسوء هو الخساره المعنويه...يجب ان يكون هناك ثمن لحزنك،لغضبك،لسكوتك، لتجاهلك الثمن هنا قيمته ادبيه ومعنويه تظهر في شكل تقدير

استماتتك في انك متتنزليش عن هذا التقدير في راي المتواضع يعنى تحررك... يعني عدم استسلامك والقبول بالقليل لانه لا يوجد بديل… كل يوم حيعدي عليكي القليل ده حينقص لغايه ما يخلص ومش حتحسي بيه الا لما تكوني مش قادره تستمري خلاص لان التراكمات لا تعرف عزيز

علشان كده اختاري كويس واصبري شويه الطلاق مش نهايه العالم والوحدة اللي حتحسي بيها وانتي مش متجوزه حتكون اقل من الوحدة اللي حتحسي بيها لو عايشه مع زوج عباره عن
"إطار فارغ، بدون مضمون، بدون احساس" خليكي قويه وتحدي نفسك قبل مجتمعك لان الناس مش حتعيش معاكي...اصنعي حياتك وفصليها علي مقاسك وعلي ذوقك متستسلميش لليأس لان رزقك مكتوب ليكي… متستعجليش لان الخساره بتهد فيكي، لان ببساطه حتى لو فيه اولاد فالخاسر الأساسي هم أطراف العلاقه لان الأطفال ممكن يفتقدوا وجود احد للاطراف سواء الاب او الام لكن ده مش بينقص من مقدار حبه ليهم...اختاري صح وفكري كويس في نفسك اولا هل هتكوني سعيده بالعلاقة دي ولا لأ …علشان تستحملي تبعتها من مشكلات...اتأكدي ان العلاقه دي علي مقاسك لان العلاقه مش بتنفع تتظبط بعد كده ولما بتحولي تغيري فيها بتخرب…فمتحوليش تغيري اللي مش بيتغير… هو بس بياخد من وقتك ومن روحك بياخد من فكرك ومن إحساسك بيقفدك كتير من نورك فمتتنزليش عن كونك غالية جدا وقولي لا لأي حد واَي حاجه تطفيكي خليكي ديما قويه خليكي دائما انتي