إنت مين من دول مشاريع الجامعة؟

تعرف فلان آه، دخلت معاه جروب بروجيكت لأ، يبقى ما تعرفوش.. الجروب بروجيكت ده أكتر حاجة بتبينلك شخصية اللى قدامك، وبيبقى فيه كمية خناقات وساعات بنخسر بعض، هتلاقى فى الجروب ده أنواع كتير من الناس هتلاقى اللى على طول الحجج عنده ما بتخلص ابن خالة ماما فى المستشفى، ابن عم بابا عيان، معلش أصل عندى كورس أو عندى تمرين وبيبقى على طول مشغول تحس إنك شغال مع وزير الداخلية وعلى طول عايز يمشى أو بيتكلم فى الموبايل ولما يحن علينا ويجى بيكون شاهد عيان. وفيه اللى حاسس على طول بالمسئولية وشايل الجروب كله على ضهره وده تقريبا اللى بيخسر صحابه كلهم وبيكره اليوم اللى عرفهم فيه، وفيه المسيطر اللى رأيه لازم يمشى وبيحسسك إن قراراته كلها مصيرية. وفيه اللى بيكيش اللى بيدفعلك أى حاجة فى المشروع ده. حبيبنا كلنا ده وتقريبا بيبقى أغنى واحد فى الشلة، وأبوالعريف اللى فاكر نفسه فاهم كل حاجة. لكن أصعب واحد بجد هو اللى بيبقى عنده كبت فى البيت وجى يفرغ كل طاقته مع صحابه فى الرغى وقصص ملهاش نهاية. وفيه اللى تفكيره كله فى الأكل فى أى Meeting بيفكر هيفطر إيه وفين. وفيه اللى على طول معترض على أى حاجة وبيحب يحط الـtouch بتاعه، وفيه اللى مكبر دماغه وبايع القضية ومش فارق معاه حاجة حتى لو الجروب كله قام ضرب بعضه هو ثابت على موقفه، رزين كده وعلى وضعه وده فى الآخر بنديله كلمتين يقولهم فى الـpresentation وخلاص على كده. ده غير الـfashion model اللى كل ما ينزلوا يجتمعوا ويشتغلوا بتقضيها فى الحمام بتظبظ المكياج. وعندك بقى أحلى واحدة الكيوت الهادية الموافقة على أى حاجة دى بسكوتة البروجيكت، وفى الآخر كلنا بشر فنستحمل بعض مش مشروع اللى يخسر الناس بعضها.