ومين كسبان؟ عبدالفتاح العُمدة

ومين كسبان..
من الفتنة اللي صابتنا ولا الطوفان..
ومـ الدم اللي زي السيل في كل مكان..
عشان في الرأي مختلفين بنتقاتل..
في غمضة عين نسينا عشرة الميدان..

ومين كسبان..
وطننا بيغلى مـ الفتنة كما البركان..
ومين كسبان سوا إخوان وغير إخوان
ماهي سفينة شايلانا ولو غِرْقت..
هنغرق كلّنا بيها فـ بحور أحزان..

ومن إمتى في مصر الدم متصنّف..
حلال وحرام.. عشان الفكر إيّا كان..
ومن إمتى في مصر الدم كان ألوان؟
ماهو الدم لون واحد.. ما دام مصري..
فليه تشمت وليه أشمت وننسى زمان
ساعة ما شيلتني متصاب..
ويوم ما الظالم اتنحّى..
وخدنا بعض بالأحضان..
يا ألف خسارة وخسارة وصلنا خلاص
لمين داين ومين خاين ومين متخان..!
وهو بجد مين في الحرب دي كسبان..
ياريت نتصافى نرجع تاني إيد واحدة..
عشان ترسى سفينتنا في بر أمان..

في غمضة عين..
بقينا فـ بعض بنخوّن في ذمة ودين..
وهي الحرب ما بينّا لصالح مين؟
نزيفك يا وطن مجروح نهاية روح..
ياريتنا نوقفه من قبل ما يفوت الأوان

كفاية بعاد
بلدنا شملها اتفرّق بقينا بلاد
وكل بيوتنا لابسة اسود وعايشة حداد
عمانا الكُره وقلوبنا خلاص ماتت..
بتغزل مننا لينا الفتن.. أكفان..
ومين كسبان؟..