بنتين في المترو.. عبدالفتاح العمدة

بيضحك عليكي وبرضو مُصرّة
تدوبي فـ هواه طب خلاص إنتي حُرّة
لكن في نصيحة أخيرة هقولها
كتير مـ اللي جوا ما بيبانش برّة

خلاص إنتي حرّة دوبي فـ غرامو..
وخليكي واثقة تملّي فـ كلامو
ويخلص نهارك روحيله فـ منامو
يا فالت عيارك وكنتي في جرّة..

ده خاين وغدار وبياع هوا
بيظهر هواه لما تبقوا سوا
مريض بالنفاق يعني مالوش دوا
ولا فيه في قلبه من الصدق ذرّة
وبرضو مُصرّة.. خلاص انتي حرّة

بلاش طب تعالي عليه واستخيري
عموما هقولك وأخلص ضميري
عشان إنتي مني ومصيرك مصيري
ده حاول معايا ولا ألف مرّة..!
وبرضو مُصرّة.. خلاص انتي حرّة

ده خاين مايملاش عنيه غير تراب
كتير حب قبلك وعذب وساب
ومكار بيدخل ده من ألف باب
وهتلاقي ليكي فـ هواه ألف ضُرّة..
ولسه مُصرّة..

دا دايما بيظهر ملاك مـ البراءة
واسمه أساسا شيطان في البطاقة
ووشه بيظهر بلون الإضاءة..
نفاقه معدي حدود المجرّة..
ولا فيه في قلبه من الصدق ذرّة
وبرضو مُصرّة..

فـ فوقي لنفسك.. ماتمشيش بقلبك
وليه المذلة..وإيه اللي صالبك..
على حب واحد أناني وسالبك..
حقوقك بذوقك.. وليه مستمرة..
خلاص انتي حرة..

لا هينوبني حاجة لا من ده.. ولاده
أنا كل همي تعيشي فـ سعادة
وتلقي اللي يقدر يصونك زيادة
يحافظ عليكي مايبقاش "حمادة"
وتبني بحلاله حياة مستقرة..
وبرضو انتي حرّة..

نصيحة ويسلم لسان اللي قالها..
مفيش شيلة بتهدّ غير اللي شالها
وانا جبت أخري ونصايحي بحالها..
سلام يالا أنا أصلي نازلة مسرّة..