بالصورة.. نجل إبراهيم يسري يستعيد ذكرياته مع والده بكلمات مبكية

نعى محمد إبراهيم يسري، نجل الفنان الراحل إبراهيم يسري، والده بكلمات مؤثرة عبر صفحته الشخصية بموقع "فيس بوك".

محمد، قال: "الفراق صعب على اللي عايشين بس"، جملة سمعتها من واحد قاعد في المستشفى لما شافني شايل أبويا و داخل أغسّله ومن ساعتها وهي بترن في ودني.. ممكن ناس كتير تشكك في مصداقيتي لو اتكلمت عن أبويا لكن بصراحة دي آخر حاجة ممكن أفكر فيها لأن ربنا وحده اللي عالم إن كل كلمة بكتبها دلوقتي مش هتوفي الراجل ده حقه.. وأنا مش بتكلم عن الفنان، لأنه زى أي فنان بيمتهن الفن لا يمكن الناس كلها تجتمع عليه و أكيد هتتفاوت درجات حبهم ليه.. أما الإنسان ف ده موضوع تاني خالص".

وأضاف: "من نعم ربنا علينا إنه الحمد لله حبب ناس كتير فيه وكلهم بيشهدوا بأخلاقه حتى لو علاقتهم بيه بس من خلال التلفزيون.. كل اللي يعرفونا كويس عارفين إننا عيلة صغيرة أوي وعلاقتنا قوية أوي ببعض وده كله بفضل أبويا وأمي برغم إن والدي فقد والديه وهو طفل صغير واللي ربته كانت أخته الله يرحمها.. وكانت نتيجة ده إنه كبر هادئ الطباع، بيحب خصوصيته جداً، عاشق للقراءة، بيكره الصوت العالي وبيحافظ دايمًا على حدود الاحترام في التعامل مع أي حد بغض النظر عن مكانة الشخص ده سواء في الوسط الفني أو في الحياة العامة".

وتابع: " وأنا طفل عندي ١٤ سنة كنت واقف في المطبخ و أبويا الله يرحمه كان موجود وسامعني وأنا بتكلم في التليفون  أنا أهلي كانوا معودني إني أتكلم وأقول اللي أنا عايزه قدامهم عادي ومخافش لأَنِّي لو خفت ابقي بغلط، المهم إنه سمعني وأنا بقول علي واحدة معانا في المدرسة إنها سخيفة أوي وبعد ما قفلت التليفون جابني وقعد يتكلم معايا وطلب مني إني عمري ما تكلم على حد من ضهره وإني حتى لما أكبر وأتعرف على حد عمري ماتكلم على أسراره أو عنه أبدا مهما كان غلطان فيا.. كانت هي دي أخلاق إبراهيم يسري.. عاش رجلا بأخلاق الفرسان النبلاء حتى و إن لم تكن تلك سمات زمنه ورحل عنا تاركًا سيرة طيبة.. الفراق فعلا صعب على اللي عايشين بس.. بس لما بيكون حد ربنا محبب فيه الناس بالشكل ده بيبقي الفراق صعب أوي.. الغائب الحاضر‬ ‫ ‏رحل الفارس عن دنياي‬ ‫ ‏وداعاً إبراهيم يسري‬".