بيت الشعر يا بيتنا

شعورا منى باهمية الشعر فى حياة الشاعر..وتضامنا مع كل الشعراء..والشاعرين..والمتشاعرين...قررت البحث فى هذا الامر..على الفور قمت بالاتصال بحبيبى وصديقى الشاعر المشعر ( شعراوى شعرانى ) واتفقنا على ان نلتقى فى مقهى ابناء سوهاج...وفى الموعد المحدد قابلت ( شعراوى ) هناك...ماشاء الله عليك يا شعراوى...شعرك ناعم...وبعد السلامات والطيبات ثم مداولات ومناقشات ..تلاها عصير قصب ومرطبات ...وشيشة لشعراوى...و2 كبدة و2 سجق للعبد لله ...فقد جعلنى الموضوع ( اشعر) بالجوع
قررت وشعراوى اقامة ندوة شعرية ...فى حتة واسعة...ونجيب كراسى من ابو نسمة ..ونتحدث فيما بيننا بصدق واخلاص عن الشعر والشاعر والشعور والذقون والحواجب
وايمانا منى بوجوب التجهيز والترتيب ...فقد تطوعت ان اكون ( الجنرال مانجر ) بتاع الليلة دى...واتخذت عدة قرارات فقد قررنا ما هو ات
اولا : ممنوع منعا باتا دخول الشعراء القرع و الصلع ..ولو صلعا خفيفا..الندوة شعرية..وغياب الشعر..فال وحش
ثانيا: معلش..ممنوع الاطفال الاقل من 35 سنة ..مش عشان حاجة..لكن اصل الشعر... كلام (كبير )
ثالثا : اثناء الندوة ممنوع معاكسة البنات...فوق 35 سنة..اختشى ..
رابعا : يمنع منعا باتا قزقزة اللب والفول السودانى ويمنع اكل الموز والخس ..حفاظا على شعور ومشاعر الشاعر ( ميمون )
خامسا : هناك بوفية مفتوح...مكرونة( شعرية).بالكبد والقوانص..فى الفرن...تخش الفرن تاكل...وتطلع تجد .شراب( شعير) ..خالى من الكحول..لو بتحب الكحول....هات معاك سبرتو
سادسا : على من يريد الانضمام..تسريح (شعرة)..حبذا لو جل (ابو دقشوم )...وللتوضيح اقول ان الشعر المنكوش ..هو تماما ..كالقصيدة الشعرية..المفككة...المنعكشة
سابعا : يتعارض مضمون الندوة مع ( اشعارات الفيس ) لذا على المشاركين الكرام قبل بدء الندوة ...تسليم الهواتف ..والاى باد..والاى بود..والبلاك بيرى..والساعة ..والحزام...و25 جنية حق المكرونة والشعير..و 5 جنية رهن الكرسى..ال 5 جنية دى ...لابو نسمة....سلم متعلقاتك السابقة ..لشاعرنا الكبير المرحوم عم الحاج ( شعير ابو الشعور )..ماتخافش تبعنا
واخيرا تقبلوا محبى الشعر فائق شعورنا الشاعر بشعوركم بنا