بالفيديو.. حلقة ناريه لـ"أديب".. يا حكومة ما تضيقوش علينا علشان ما جناش على مزاجكم" !!

انتقد الإعلامي عمرو أديب، تضييق الدولة الخناق على بعض وسائل الإعلام المصرية بسبب شعور بعض المسئولين في الدولة أن الإعلام لم يعد "على مزاجهم" -على حد وصفه-.

وقال أديب في برنامجه "القاهرة اليوم"، المذاع على فضائية اليوم، موجها حديثه للمسئولين بالدولة: "أنا عايز أسأل سؤال قد يبدو غبي، هو الإعلام أمتى باعكم، أمتى احتجت الإعلام في قضية مهمة ولم تجده، أمتى الإعلام استغنى عنك، كان ممكن نبيعك 100 مرة قبل كده".

واستطرد: "الكلام اللي بيتقال إيه الإعلام ده، وأيه برامج التوك شو دي، والتوك شو لازم ينتهي، طيب هو التوك شو مكانش لازم ينتهي من 3 سنين فاتوا ليه، هو الإعلام لما يبقى على المزاج يبقى إعلام وطني وهو ده الإعلام اللي إحنا عايزينه، وهو ده الإعلام المناضل المقاتل، ولما ما يبقاش على المزاج ويبتدي يقوم بدور ما يبقاش وطني".

واسترسل: "أنا ابتديت استعجب بصراحة، إحنا ليه بنطلع كل يوم، أنا قلت الكلام ده وقت مبارك، وقلت الكلام ده وقت مرسي، وبقول الكلام ده دلوقتي أبعدوا عن الإعلام، مفيش مجتمع هايتقدم غير بإعلام يقول اللي هو عايزه، ما تحاولش تضيق على الإعلام، إحنا في مجتمع ما فيهوش برلمان، ولا أنت مش عايز رقابة، هو يعني لما حد ينزعج من الداخلية أو الخارجية أو رئاسة الوزراء، ده يبقى تافه ليه؟، لأن إحنا أهم حاجة عندنا الاصطفاف كله ارفع إيديك، ارفع رجليك، إطلع فوق إنزل تحت تحيا جمهورية مصر العربية، خد مسطرتين".

واستكمل: "أنا مش عارف أنتوا عايزينا نسكت، وإحنا زمان أيام مبارك، كان الواحد بيجيله التليفون في الفاصل يقول له أنت إيه لونك متغير ليه، بس المسألة بسيطة خالص أنت عندك 40 محطة تليفزيون أعمل مذيعك وأعمل إعلامك، والإعلام ده يطلع يقول عادي إن العربية المصفحة تقتحم الحاجز الأمني لقسم العريش وتدخل جوه عادي وده شيء طبيعي".

وتابع: "في حد لعب في دماغ حد وقال له إن أعظم إعلام كان موجود أيام الرئيس الخالد جمال عبد الناصر، طيب أنا عايز أسألك سؤال هو الإعلام ده ودى الرئيس عبد الناصر فين، مش ده الإعلام اللي كان بيقول إن إحنا دخلنا تل أبيب، وإن إحنا كنا بنصنع كل حاجة من الإبرة للصاروخ، ومش ده الإعلام اللي اتسجن نصه بعد كده، ومفيد فوزي عايش لغاية النهاردة روحوا أسألوه لما اتنقل من مجلة علشان كتب حاجة ما عجبتش الرئيس عبد الناصر، وأسألوا صلاح عيسى كان بيعمل إيه في سجون عبد الناصر، هو ده الإعلام اللي أنتوا عايزينه".

وقال: "عمر الإعلام ما باع الدولة دي، وهاقول حاجة قد تبدو وقحة، الإعلاميين اللي كانوا بيشتغلوا في عصر مبارك عمرهم ما باعوه لغاية ما مشي، لأنهم كانوا شيفين إن هو ده الدولة، إحنا وقت الإخوان كنا بنتاخد رايح جاي، وابتدت الموجة تاني دلوقتي أهه، يسلطوا عليك ناس ويقولوا لك البلد مش ناقصة، أيوة البلد مش ناقصة علشان كده إحنا بنتكلم أمال مين اللي هيتكلم، ولا الحكومة هاتنتقد نفسها وناوية تعمل نظام منه فيه، أحادي الخلية زي الأميبا كده".