أمين حداد يتجلى بـ"سبعة أمتار" على المسرح الصغير (فيديو)

ألقى الشاعر أمين حداد، مساء أمس الأربعاء، قصيدة "سبعة أمتار" من ديوان "ريحة الحبايب"، في أمسية شعرية على المسرح الصغير بدار الأوبرا المصرية، ضمن النشاط الثقافي والفني الذي ينظمها، برئاسة الدكتور مجدي صابر.

ومن كلمات تلك القصيدة:

فاكره أول مره
طلعنا فيها الجبل
ولّعنا نار
وفضلنا نتكلم لحد خيط النهار
هوَّ احنا كنا سوا ؟
والا أسراب النجوم اللى حطت ع الجبل فجأه
لمّتنا من مكانين بعاد فى الأرض
لمتنا من زمانين بعاد عن بعض
طب فاكره أول مره بصيت لك
أنا كنت نايم ع السرير الصاج
و كنتى جايه فى يوم ماهوش جمعه
و فضلت أقولك قصيدة حب بتشوك
من غير ما اقولك إنها عنّك
و ضحكتى ضحكه منوره بألوان
و اتنطورت فى الأوده... ورد وفل وبنفسج
و رجعت ابص على زراير بيجامتى
مكسوف ومتلجلج
هو احنا كنّا سوا ؟
والا افتكرت ان القمر.. إنتى
طب فاكره يوم فى المطر بالليل وشبّوره
و فاكره يوم ما اتقابلنا صدفه فى الشارع
و يوم ما جدّك مات وجيتى الصبح وسمعتك...
... من ورا المكتبه
طب يوم ما غنيت لك أغانى فريد
و يوم ما رحنا شقتنا الجديده
و يوم ما سيبناها
و يوم انقطاع النور عن القاهره
و يوم ظلام القاهره فى الضهر
أيام كتير فى الذاكره
عايزك تقولى بجد
أنا أصلى مش متأكد
هو احنا كنّا سوا ؟
أنا فى الهوا ماشى
بعيد عن الأرض بمسافة سبعة امتار
و بعيد عن الدنيا بسبعة امتار
و بعيد عن الآخره بسبعة امتار
ماشى بدموعى وحالتى ما تطمنش
لكن باحوم ع العش
مستنى منِّك إجابه
بعيد عنّك....
.... أنا ما باعيشش !

يذكر أن أمين حداد أحد الأسماء اللامعة فى شعر العامية المصرية، ومن أبرز الأصوات الشعرية فى جيله، خرج من عباءة والده الشاعر الكبير فؤاد حداد، وتأثر بالشاعر الكبير صلاح جاهين، نال جائزة كفافيس للشعر عام 2011 عن مجمل أعماله، له عدة دواوين شعرية منها ريحة الحبايب، حلاوة روح، فى الموت هانعيش، بدل فاقد، من الوطن للجنة، أسس فرقة الشارع التى تمزج بين الشعر والغناء، كما نشر مجلة ابن عروس التى تتناول شعر العامية منذ 1990، وكتب مجموعة من الأعمال الغنائية ودوبلاج العديد من أفلام والت ديزنى المترجمة إلى العربية.