رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

«معرفتش أربى».. إليك أشهر قواميس الأم المصرية

الأم المصرية
الأم المصرية

الأمهات بصفة عامة بتجتمع على كام صفة كده اللى بيبقى كلها حب وحنية وحاجات العواطف الجميلة دى، إنما الأم المصرية بصفة خاصة كده بتتميز بحاجات كتيرة بتميزها عن أى أم فى العالم، ومن الحاجات دى مثلا قاموسها اللى فيه جمل مش بيقولها حد غيرها تقريبا، وده إدى الشك تقريبا لأغلب العيال إن أمهاتهم بيتفقوا يقولوها مع بعض أو حاجة موروثة لأى واحدة هتقرر تكون أم، وعلى الأغلب لما تيجى سيرة البيت فى كلامنا ونحكى لبعض لازم يخلص كلامنا وإحنا بنقول لبعض هى مامتك تعرف مامتى ولاّ إيه؟، الجمل دى بتكون مشهورة فى أى بيت مصرى أصيل عادى جدا، وطبعا ده ما يمنعش إنك بنت ولا ولد فى كل الأحوال لازم تسمع مامتك وهى بتقول:
- قومى ساعدينى ده اللى هيتجوزك أمه داعيه عليه
- افرد ضهرك وأنت قاعد
- اصبر عليا لما الضيوف يمشوا
- سيب الزفت ده واقعد ذاكر
- متاكلش وأنت واقف
- ما أنت مش فالح غير فى التفاهة
- بكرة تخلف عيال يطلعوا عينك زى ما أنت مطلع عينى
- أنا سيبالكم البيت ومش هتشوفوا وشى تانى
- هات كيس عيش وأنت راجع
- العيال صحابك دول عيال بايظة ما تمشيش معاهم تانى
- جتها نيلة اللى عايزة الخلف تيجى تتفرج
- يا ريتك بتحفظ دروسك زى ما بتحفظ الأغانى كده
- لو شفت خناقة مالكش دعوة بيها
- لمى هدومك إنتى مش عايشة فى زريبة بكرة بيتك هيكون خرابة طبعا
- لم هدومك وشراباتك دى
- أهو أنا الخدامة اللى جابهالكم أبوكم
- إطفى نور الأوضة بعد ما تطلع منها
- إلبس الفانلة يابنى هتاخد برد
- أبوك عندك أهو اتصرف معاه
- مخلفة عاهة يا ربى
- قومى اغسلى المواعين
- ليه يا رب مفيش حد حاسس بيا بعد كل اللى بعمله ده
- إلبس الشبشب وانت داخل الحمام
- يا بنى خلصت إيه المذاكرة ما بتخلصش
- كنت فين لحد دلوقتى يا صايع؟.