سكون.. سؤال لازم تتسئله!

ظلمت ليه؟ أذيت ليه؟ وجعت ليه ؟
سؤال لازم تتسئله
( وَإِذَا الْمَوْءُودَةُ سُئِلَتْ بِأَيِّ ذَنْبٍ قُتِلَتْ )
إنت إتقتلت ليه ؟!
معرفش !
قتلتها ليه ؟!

ليه السؤال ما ده يوم حساب وكل واحد يأخذ جزاءه وخلاص !
تصدق إن ده مش كاف !

لازم المظلوم يعرف إتظلم ليه ؟!
والظالم يعترف ظلم ليه ؟!

وده من لطف ربنا وعدله وإكتمال منظومة الحق..لأن عقل الإنسان متبرمج على السبب والمسبب!

ده إنت ممكن تتنازل عن حقك وانت في خلاف مع حد..لمجرد إنه يعترف لك بخطأه في حقك !
إيه إللي يخليك تتنازل ؟
ده أنت مجرد عرفت منه هو وجعك ليه !

ده تركيبة عقلك عايز يفهم..
ولما يفهم ممكن يعرف يهدى ويسامح ويعفو..

يوم حساب وفي قبضة خالق.. عالم.. إلا إنه هيعرفك السبب وهيسأله عن السبب !
من أقل حاجه لأكبر حاجه..

ظلمت ليه ؟
وجعت ليه ؟
أذيت ليه ؟

(فَوَرَبِّكَ لَنَسْأَلَنَّهُمْ أَجْمَعِيْنَ * عَمَّا كَانُوا يَعْمَلُونَ )

لكن وقتها مفيش جدال..وإنك تضحك على نفسك وتصدقها مش آوانه خلاص !
(وَإِذَا الصُّحُفُ نُشِرَتْ )
كله منشور بالتفصيل..

وبرغم كل ده هتتسأل
عشان المواجهه دي لازم تحصل !

عشان المواجهه إللي هربت منها..الحقيقه إللي كابرت وعندت عشان متشفهاش.. الأذيه إللي بتبرأ نفسك منها..الوجع إللي بتنكر إنك ليك أي يد فيه.. ضميرك إللي بتموته بالعافيه.. المبررات إللي بتخلقها من عدم..
إجتهدت عشان كل ده !
أهدرت ضميرك وطاقتك في كل ده !

ليه ؟ ليه بتعمل في نفسك كده ؟
خايف تواجهها ؟
معاك المواجهه صعبه..
لكن مهما كانت نتايجها فهي أهون كتير من مواجهه في مشهد صعب يكون فيه ندم أو تراجع أو قوه أو عند !

مشهد فيه الحقيقه وبس..
مشهد مرعب !
إعمل حسابه..


#saraosama