الأمهات المكرمات من الرئاسة لـ«الدستور»: «نتمنى السيسي ميسبناش»

بكلمات من الحب والفخر.. عبر أمهات مصر المثاليات عن سعادتهن وتحقيق أحلامهن، عند لقائهم بالرئيس عبد الفتاح السيسي، خلال احتفالية كبرى نظمتها الرئاسة، تعبيرًا عن رد الجميل لهن.

وتحدثت "الدستور" معهن لمعرفة شعورهن بلقاء الرئيس وتكريمه لهن.

الحاجة سلوى يحيى سعد عامر، الأم المثالية الأولى عن محافظة الجيزة، قالت "أنا في منتهى السعادة أنى قابلت الرئيس وده فخر ليا، وشعور كبير أوى بالنسبة لي، خاصة أنا من الناس اللي بتأيده، ومع كل اللي بيعمله خاصة اللي عمله لولادنا من ذوى الاحتياجات الخاصة، وتخصيصه 2018 عامًا لذوى الإعاقة، والرئيس سألني عايزة إيه وأنا طلبت أحج".

ثناء غالى بشاى غالى، الأم المثالية الثانية على محافظة أسيوط، قالت "أنا مبسوطة جدا أنى قابلت الرئيس عبد الفتاح السيسي، ولم أكن أتخيل أنى أقابله طول حياتي ده تكريم من ربنا، وطلبت منه شقة تمليك في أسيوط".

الحاجة ألماظ أبو السعود على كرد، الأم المثالية الثالثة على محافظة الفيوم، قالت "من كتر سعادتي دموعي سبقتني، مرة أضحك ومرة أعيط حلم بالنسبة لى أنى قابلت الرئيس، وقولتله ربنا يخليك لينا، وطلبت منه أنى أحج".

ميرفت عبد الرؤوف سليمان رزق، الأم المثالية الأولى على محافظة الغربية، قالت "أنا مبسوطة جدا أنى قابلته وكانت أمنية حياتي أنى أقابله حتى من قبل ما يكون رئيس من وهو مشير، فرحتي أنى شوفته اكتر من فرحتي أنى بقيت أم مثالية، وطلبت منه أحج".

نادية محمد أبو الحمد خليفة، الأم المثالية الأولى على محافظة كفر الشيخ، قالت" فرحانة أوى وطلبت منه ميسبناش خالص، ويستمر معانا وربنا يقويه ويسترها معاه ويقدره علينا، أنا كنت قلقانة أوى وفضلت يومين مش بنام".

مديحة محمد فتح الباب، الأم المثالية الأولى عن شمال سيناء، قالت "شعوري كنت متوترة وبقول يارب أوقف جانبه على كل اللي بيعمله ويطهر لنا مصر من الإرهاب، ويحفظ مصر في عهده من كل سوء هو بيحب مصر وإحنا بنحبه، وهطلبت منه أنى أروح أحج

ماجدة أحمد عشماوي على، الأم المثالية الأولى على محافظة السويس، قالت "أنا سعيدة جدا جدا أنى شوفت الرئيس لأول مرة لأني من المعجبين جدا بشخصيته، وبأسلوبه فى إدارة البلد، والانجازات اللى عملها فى البلد، والطرق، والمصانع، وقناه السويس، وقولتله ربنا يقويك علينا يا ريس".

ثناء فهمي حسن عبد السميع الأم المثالية الأولى على محافظة دمياط، قالت "أنا من سعادتي معرفتش أطلب منه إيه، وفرحانة أني قابلت أكبر شخصية في البلد وسعيدة أني شوفته، وطلبت منه إن ابني يشتغل".

بدوية محمد على سالم الأم المثالية الأولى على محافظة الدقهلية قالت "أنا سعيدة انى اتكرمت قدام العالم كله بتكريمي من الرئيس، وسعيدة أوى برحلة كفاحي، وفرحانة علشانى وعلشان كل أم.

ايزيس عزيز ونيس حنا الأم المثالية الأولى على محافظة بنى سويف، قالت "أنا مبسوطة أنى قابلته، وسلمت عليه وشكرته على كل حاجة عملها لينا، ومتطلبتش منه حاجة لأنه عامل لنا كل حاجة.

أمال محمد حامد عبد القادر الأم المثالية الأولى على محافظة البحر الأحمر، قالت "أنا شعوري ميتوصفش أنا سعيدة أوى أن شوفت الرئيس، كانت أمنية حياتي إني أقابل الرئيس لشخصه مش لأي حاجة، وطلبت منه شقة لابني لأنه ساكن في شقة إيجار غالية عليه.

ثناء كامل محمد على الشافعي، الأم المثالية الأولى عن محافظة الإسماعيلية، قالت "أنا فرحانة أوى وربنا يخلي لينا الرئيس ويبارك فيه يارب، وعمري ما أتخيلت أني هقابله، نفسي أحج وانهي مشوار حياتي بحجة ازور فيها بيت ربنا.

الحاجة عفاف عبد المنعم محمد مكاوي، الأم المثالية الأولى عن محافظة بورسعيد، قالت "أنا سعيدة جدًا أنى شوفته، وأنا من مؤيديه بدرجة كبيرة جدا، وطلبت منه اشغل أولادي لأنها أمنية حياتي.

ماجدة راشد حسن عطية، الأم المثالية الأولى على محافظة البحيرة، قالت " لم أكن أتوقع تكريمي من الرئيس عبد الفتاح السيسي، وفرحانة أوى بتكريم الرئيس ليا، وأنا سعيدة أوى بمقابلته، وتكريمه ليا محا جهد وتعب سنين في تربية أولادى حتى وصلت بيهم لبر الأمان، وأتمنى توفيق الرئيس في نقل ابني من مرسى مطروح لبنى سويف لأنه بعيد عننا كتير.

عزة صابر زكريا، الأولى على محافظة المنيا، قالت "أنا سعيدة أوى بتكريم الرئيس ليا، أنا منمتش من أول ما أعلنوا فوزي كأم مثالية على المحافظة، وشعوري بالفخر والتقدير بتكريمه، خاصة وإن قدمت من 5 سنوات وما فوزتش، فإعادة التجربة شئ صعب كنت خايفة من عدم فوزي مرة ثانية، ولكن بعد إعلان فوزي والآن تكريمي من الرئيس حققت هدف من أهداف حياتي كنت بسعى له من سنين، وطالبت من الرئيس أروح بيت الله الحرام، وأتمنى أن يلبي رغبتي في القريب العاجل".

المهندسة لمياء محمد عبد الوهاب، الأم المثالية الأولي على محافظة المنوفية، قالت "أنا مبسوطة أوى وسعيدة بتكريم الرئيس ليا، وأنا سعيدة بالتكريم لأنه بيدعو للأمل والتفاؤل ورسالة لكل أم تعبت أن ربنا هيجازيها، وأشكر جدا الرئيس وأقدره على جهده في النهوض بالدولة".

عزات احمد السيد المساح الأولى على محافظة الشرقية، قالت" بحب الرئيس وباعتباره فخر للمصريين، وأنا وصلت لأقصى أحلامي اللي كنت نفسي فيها وسعيت سنين طويلة لأحققها، وطلبت من الرئيس حج بيت الله لأنه أخر حلم بتمناه وأتمنى أن يحققه ليا".

زكية أبو الحسن حسين جاد الله عبد الواحد الأم المثالية الأولى على محافظة قنا، قالت "ربنا استجاب لدعائي وشوفت الرئيس كنت بصلي الفجر وبدعي أشوف الرئيس وأسلم عليه ومتوقعتش أن ربنا هيستجيب ليا وأشوفه في الحقيقة، وأنه يكرمني ويسلم عليا، فهي نعمة من ربنا حققها لي، وطلبت من الرئيس بيت صغير لان بيتى وقع من 3 سنين وأنا ساكنة دلوقتى في بيت بإيجار".

نادية متولي أبو رحاب حارس، الأولي على محافظة القاهرة، قالت "سعيدة أوى بمقابلة الرئيس وتكريمه ليا، وربنا كرمني بالتكريم ده فى وقت احتاجه فيه، "دعيت ربنا يوفق الرئيس كتير وأن ربنا يكون معاه ويوفقه لصالح البلد".

أما دهب فرغلي فرحات عامر الأم المثالية الأولي على محافظة الوادي الجديد، قالت "كانت مفاجأة ليا أن الرئيس يكرمني، مش مصدقة نفسي لحد دلوقتى، وسعيدة أوى أن ربنا كرمنى بتكريم الرئيس كان حلم وربنا حققه، فرحانة بالرئيس وبدوره العظيم اللى بيعمله فى البلد، بدعى ربنا يصلح حاله وحال البلد".

وأكدت إيفون حبيب لبيب غطاس الأم المثالية الأولى على محافظة سوهاج، قالت "أنا سعيدة أوى ومبسوطة ومش متوقعة تكريم الرئيس ليا، فوزى بالأم المثالية شعور ميتوصفش، ومن فرحتى منمتش دة الرئيس اللي كنت بحلم أشوفه، طلبت منه ان يوفر ليا معاش استثنائي لان جوزى شهيد فى الجيش وملوش معاش".

أما نفيسة أحمد شيبة الحمد محمد الأم المثالية الأولى على محافظة الأقصر قالت " أنا فرحانة ومتوقعتش تكريمى من الرئيس، مكنش عندي طلبات له غير ان ربنا يوفقه ويكرمه ويصلح حاله وحال البلد".

وقالت تحرير عبد الحليم الأم المثالية الأولى على محافظة جنوب سيناء، قالت "ربنا يحفظ الرئيس ويكرمه زى ما كرمنا وفرحنا بتكريمه لينا، ربنا يبارك فيه ويخليه لمصر".

أما نعيمة طه أحمد سليمان الأم البديلة من محافظة بني سويف، قالت "مش قادرة أوصف فرحتى بتكريمي من الرئيس، كان نفسي أشوفه وأسلم عليه، ربنا حقق لي حلمي، ربنا يخليه لمصر".

وقالت عزيزة عبد الستار حمزة على الأم المثالية من ذوى الاحتياجات الخاصة، "كفاية أني اتكرمت من الرئيس مش عايزة حاجة تاني، حلم وربنا حققه ليا، بتمني ربنا يخليه لينا ويفوز وينجح فى حياته".