دماغ رجالة.. إزاى تتعاملى مع راجل فوق الـ35؟
هل فكرتِ يومًا كيف يفكر الرجال، وماذا يريدون من المرأة خصوصًا بعد سن الثلاثين، قدم وليد عبدالخالق نصائح ساخرة كدليل للتعامل مع الرجل بعد الـ 35، علي «فيسبوك»، لتحقق نصائحه انتشارًا واسعًا وتفاعلًا مع الفتيات، واتفق معه أغلب الشباب بأن هذه هي طريقة تفكيرهم.
ولخص وليد دليل التعامل في عدة نقاط..
- مبدئيًا كده اوعي تقوليله نعمل فرح وبطيخ هو أصلًا اتجوزك بالعافيه كتجديد مش أكتر.
- متستغربيش بعد الجواز إنه بيبحلق فيكي وإنتي ماشيه في البيت هو بس مستغرب إن فيه كائن غيره في البيت بيمشي زيه ويدخل الحمّام وبياكل كمان، ممكن تحسي إنه بيتفرج على برنامج مخلوقات فضائية على ناشيونال جيوغرافيك.
- مش كل شوية تقوليله إنت مش بتتكلم معايا ليه؟ ونفسي أعرف إنت بتفكر في إيه!! حضرتك أقسم بالله ما هو مشغول عنك بحاجة ولا بيفكر في حاجة أصلًا هو سرحان في ملكوت اللالا لاند.
- اوعي تسأليه طبيخي عجبك ولا لأ عشان ممكن أو غالبًا هتلاقيه بيطبخ أحسن منك ومن أمك.
- ما تحاوليش تفاجئيه في البيت بأي لبس أو حركة، الراجل ده موسوعة ومش هتلاقي أي رد فعل، زيه زي كائن الكوالا بالضبط، ده ممكن يديكي دروس.
- لما تخرجي مع أصحابك إياكي ثم إياكي تتأخري وتقولي بختبره بشوف بيغير عليّا ولا لأ وهستنى يتصل بيّا، هو ممكن يكون ناسي إنه اتجوز أصلًا وبالتالي هينام ولا هايعبرك وهتروحي تلاقي باب البيت متربس من جوه.. هو لسه فاكر إنه لوحده أقسم بالله.
- اوعي تقوليله تعالى ننزل نعمل شوبنج، هو الراجل متعود يجيب حاجته لوحده في 5 دقائق وبالتالي هاتي حاجتك وإنتي ساكتة.
- مش كل شوية وهو في الشغل تتصلي بيه، ببساطه مش هيرد عليكي «مبيردش على أرقام ميعرفهاش».
- ممكن تلاقيه ماشي سارح كده في البيت زي ما أتولد «سليتي ملّيطي» برضه عادي.
- مبيحبش حد يشاركه لا في فوطة ولا شبشب ولا تتجرأي وتغسلي حاجتك في الغسالة معاه، «ممكن يبعتك لأمك أقسم بالله».
- متحاوليش برضه تعملي نيو لوك.. هو أساسًا فاكرك بالعافية.
- متحاوليش تعملي روشة وتخرجيه في شلّه أصحابك المزز.. ممكن كمان كام أسبوع تلاقي حاجة من ريحتهم عندك في البيت.
- مفيش حاجه اسمها إيه رأيك في لون شعري الجديد! هو أصلًا مش عارف هو كان إيه، كل الألوان عندنا واحد على فكرة.
وقال وليد الذي يبلغ من العمر 36 عاما ويعمل في مجال الإعلانات، إن هذه النصائح هي من واقع تجاربه الشخصية وتجارب أصدقائه المحيطين به.
