رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

سكون.. الحب والحرية!

جريدة الدستور

الحب والحرية
أيهما أولى؟ أو بمعنى أدق أنهي شعور أهم تعيش بيه؟!
الحب والحرية..
وجهان لعملة واحدة هي الحياة..
وعلاقتهم ببعض مش مباشرة لكن مكملة لمفاهيم إنسانيتك.. مثلًا عندك إيدين وعندك رجلين.. ملهمش علاقة ببعض لكن مكملين لبعض بشكل غير مباشر.. لشكلك العام لإكتمال قوامك.. لقدراتك بصفة عامة
وده نفس وضع الحب والحرية

مش معناها إني جعان إني أكون عطشان.. مش معناها إني أكلت يعني مشربش.. مفيش علاقة لكن كله غذاء !

طب ليه السؤال وليه المقارنة؟
علشان الأفكار المسيطره في عقولنا نتيجة سلوكيات وإنطباعات غلط
إنك مخنوق أو مخنوقه في علاقه حب..متأيد فتحس إن حريتك ناقصه..
وإحساسك إنك حر طليق بدون ربطه مسؤوليات وإلتزام نكد ووجع
وعشان ده أحاسيس الكتير بيعشوها.. فأحب أقولك..
إنك بالإحساس ده ولا فاهم حب ولا فاهم حريه !
لإن بإختصار الحب مينفعش يكون عبء وخنقه !
والحريه مش هتدرك معناها الحقيقي وتكتمل جواك بدون ما تعيش محب !
جبلتك فطرتها الحريه والحب بيهم تكتمل إنسانيتك..
راجع نفسك وراجع أحاسيسك..يا إنت واهم نفسك إنك بتحب وإنت محبتش وده سبب خنقتك الحقيقي..
يا إنت واهم نفسك إن ضغوط الحياه إسلوب من أساليب سلب الحريه وده مجرد فهم خاطئ لطبيعة الحياه..

الحب الحقيقي هو إستنشاق وإستشعار لأعمق معاني الحريه والإنطلاق.. إنطلاق لروحك وأفكارك وقدراتك..

بإختصار
عايز تفهم حريه صح..حب صح وبجد حب حقيقي..
عايز تفهم حب بجد عيش حريه..
حرية فكر..حرية عقل..حرية قلب.. حرية إحساس.. حرية روح..

وأرجع وأقولك كل ده السهل الممتنع تقدر تحسه لوحدك بدون أي مجهود
فعّل قلبك السليم.. سيب نفسك لفطرتك.. إقتل خوفك.. إهزم أفكارك المؤلمه..
إهدم حواجزك إللي بتقف قدام أروع أحاسيس تقدر تعيشها..

آه لو الإنسان يدرك جواه إيه يقدر يستمتع بيه وبيضيعه من إيديه !

(وَتَحْسَبُ أنَّكَ جُرْمٌ صَغِيرٌ،، وفيك إنطَوَى العالمُ الأكبرَ)