سكون..المجهول

#المجهول
شعور وارد توصله.. شعور قريب بالضياع..بالتوهان..بالفقدان.. فجأه بتلاقي البدايه نهايه..والفرحه وجع..
والشئ بقى لا شئ..صمودك يتحول لضعف..قوتك تبقى إنكسار.. مش شايف..مش قادر..مش عايز.. مشوش..رافض كل شئ..
فجأه بتكون إنسان غيرك.. فقدت قدرتك على التفكير..على القرار.. مش فاهم حاجه..مش شايف طريق.. فقدت حتى قدرتك على الحزن..بتغزوك مشاعر جديده غريبه..مش فاهمها..
أنا مين.. رايح فين.. هوصل لإيه.. في اللحظه دي محتاج إيه ؟!
آصرخ مثلا ؟ علشان صوتي يوصل لمين ؟
أنادي ؟ جايز يسمعني..يمكن ياخذ بإيدي
هو مين أصلًا ؟!
أنا عايز إيه ؟
محتاج أهرب..أختفي ؟
أبتدي أو أنتهي..مش فارقه
خسرت إيه وكسبت إيه..مش فارقه
فهمت إيه ومفهمتش إيه..مش عارف
ظالم ولا مظلوم.. مش مهم
مش عايز أي حاجه.. ومش شايف أي حد..
مدرك بتضيع إيه وبتضحي بإيه...مش حاسس..
حتى مش قادر أدعي.. لأني مش عارف هدعي بإيه.. ومفيش قدره لأي شئ..
مش متقبل.. ومش هسمع..
إنتهى !

ده بإختصار شعور ( المجهول )

ده عباره عن إيه ؟
كأن السيستم ضرب.. !

الحل إيه ؟
مش هينفع تعمل حاجه دلوقتي خليك على وضعك !

كل المطلوب منك..
1_سكووون وبس..

سيب نفسك.. إعمل إللي قادر تعمله.. متحاولش تفكر.. تغير..تقرر..مش وقته.. إللي حصل حصل ومش هتغيره دلوقتي..ركز في إللي أنت فيه

2_واظب على الآدعيه دي:
(اللهم اني اعوذ بك من حزن يوهن الجسد واعوذ بك من هم يقطع عن العين رؤية النعم والمدد)
(أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ )
(وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ )
(حَسْبُنَا اللهُ وَنِعْمَ الْوَكِيلُ)
(اللهم أرني بنور بصيرتك ما خفي عني وأرضني به وأرزقني الحكمه وحسن القرار )

3_ وقت..
والسيستم هيرجع تاني لوحده.. وهيبتدي دورك تفكر من اول وجديد.. هترتب اوراقك
وتحسبها بحساباتك وتقرر قراراتك تنقذ ما يمكن إنقاذه وترضى بكل خساره.. وتبدأ بدايه جديده.. إنسان جديد..بقوه جديده وصمود غريب..

وقت ومجهود وصبر وتقبل خساير ودعاء وإراده ومجازفه وبدايات مستمره وثقه بالله ورضا وقرار وإختيار...
أكون أو لا أكون...هي دي الحياه

(أحيانًا تحتاج إلى أن تصبح يائسًا بعض الشيء لكي تستطيع الوصول إلى أي مكان )
روبرت جرين