رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

لو هتقابل بنت لأول مرة.. اعمل كده

صوره ارشيفيه
صوره ارشيفيه


1- حاول تتكلم مع أختك كتير أو مع أى بنت فى عيلتكو قبل أول مقابلة ليك عشان تفهم الدماغ ماشية إزاى.. صدقنى فايتك كتير من كتر قعدتك مع ميدو وحمادة.
2- أول ما تتقابلوا، مش هوصيك على الجنتلة بقى.. تشدلها الكرسى عشان تقعد، تقولها المكان هنا مريحك واللا تحبى نروح حتة تانية.. طب التكييف لو مضايقك أقولهم يقفلوه.
3- بلاش من أول مرة تدبس نفسك وتجيب بوكيه ورد.. افرض ماتفقتوش أو كنت مش طايقها أو مفيش قبول، يبقى أنت كده دبست نفسك بدون داعى.. اتقل.. هتتغرم كتير ماتقلقش.
4- ابعد خااااااالص عن أبوتريكة وسيرة الكورة والماتشات والبلاى ستيشن.. كل بنت بتحس إنهم ضرتها.. حتى لو بتموت فى الكورة مش لازم تحكيلها تفاصيل ماتش الكلاسيكو اللى فات!
5- حاول ترغى.. أنا عارفة إن الرجالة غالبًا بنسبة ٩٩٪ بتكره الرغى بس معلش حاول.. ده مستقبلك.. حاول تعرف هى بتحب إيه، بتكره إيه، شخصيتها إزاى عشان مصلحتك والله.
6- حاول تندمج معاها لو حكيتلك عن صحباتها.. لأنك لو وصلت لصحباتها يبقى غالبًا الصنارة غمزت.. وحاول تحب منة صحبتها لأنها هتبقى عنصر أساسى فى حياتكو.
7- بلاااااش تاخدك الجلالة وتحكيلها عن مغامراتك العاطفية وإنك مدوخ بنات الدفعة.. الكلام ده نتيجته عكسية تمامًا.
8- قولها إنتى شيك.. إنتى دماغك حلوة.. عاجبنى تفكيرك «ده لو الجو عجبك طبعًا» هتلاقيها احمرت واخضرت واصفرت وهتقول عليك ذوق وبتفهم.
9- مش من أول مرة تشوفها تقولها مش بحب الستات اللى بتشتغل ومش بحب الستات اللى بترغى واللى.. واللى.. هتحس إنك بتتشرط وهتقفل منك.
10- مش لازم تاكل براحتك أوى كأنك قاعد على القهوة مع أصحابك فى المنيل.. هى مراقبة كل تصرفاتك وطريقتك.. دول سوس يا بابا.
11- لو حسيت إن فيه استلطاف من الطرفين بلاش جو التقل الغلس.. خليك عادى.. لا تقيل ولا مدلوق.. بس فهمها راسها من رجليها.
12- مهما كان الحساب اللى هتدفعه اوعى تقول المكان ده غالى.. هتحس إنك بخيل.. وبدال ما أنت اللى مختار المكان يبقى تدفع وأنت ساكت.. عدى الليلة.