رحاب هاني تكتب: 9 حقائق غير مفيدة إطلاقًا.. رقم 10 هتدهشك!

فيه بعض الحقايق اللى أعتقد إنه مش من المفيد إنك تستفتح بيها يومك قبل حتى ما ترش ميه.
«أيوه قريتها صح مش من المفيد»
وهى على سبيل المثال وليس الحصر:

1- كل يوم هتواجه موقف صعب «أنا آسفة - أغشك؟» بتختلف بس درجة صعوبته، فيه ليفل إحنا اتعودنا عليه فمابقاش صعب بقى «يُحتمل»!
2- عمرك ما هتقدر تتحكم فى أفعال الآخرين، يعنى مش هتعرف تخلى فلان يعمل كذا أو كذا «اللى إنت عايزه» لأن هو ماشى بدماغه هو مش دماغك إنت.
3- بعد ما قولنا على الأفعال نيجى للأسوأ..
عمرك عمرك ما هتقدر تتحكم فى مشاعر البشر.. لازم تتصالح مع الحقيقة العلمية دى وتتكيف معاها وتبقى «عادى أنا مش زعلان» تجاهها!
وربنا ما ليها حل.. ما تحاولش.
لا مالهاش! بقولك مالهاش، ما تتعبش قلبى معاك - بصوت سعيد صالح -!
4- فيه أحلام هتفضل تجرى منك مهما جريت عليها ومهما اتهيألك إنك قربت منها.. هتفضل بعيد!
المفاجأة والطريقة اللى أثبتت صحتها ٥٠٠ مليون مرة إنك أول ما هتبطل تجرى وراها هتلاقيها بتقولك «إيه ده؟ إنت روحت فين يا سونة يا خاين... كده تنسانى.. طيب استنى أنا جايه أهو».
ساعتها إنت كـ«سونة» الخاين شوف حابب تعمل إيه بقى!
5 -علاقات الحب مقرفة سخيفة وفيها مجال واسع للإبداع الفنى خصوصًا فى الخيال العلمى.. فيه مساحة للإرهاصات غير المفهومة - ولو ما فهمتش الكلام اللى إنت لسه قاريه ده يبقى إنت كويس هى دى زيتونة علاقات الحب-!
6- كل يوم هتقابل حد فاكرك ساذج، أهبل، عبيط، ممكن يتضحك عليك وفِى الحقيقة هو إنت ممكن جدًا تكون واحد من دول أو كلهم، ساعتها ربنا يكون فى عونك بس لو مش كده اللحظات دى بتبقى من أمتع لحظاتى خلال اليوم. فكرة إنك عامل نفسك أهبل عشان تجيب آخر اللى قدامك.. الصياعة أدب، والمصحف، ما هز أكتاف!
7- لازم تتعلم تبقى مرن، أنا مثلًا زمان كنت صخرة «أنا طبعى كده وبحب كده» ونيكول سابا فى نفسى من غير التاتو والعينين الزرقا والشعر الأصفر، هو أنا كنت نيكول سابا من غير نيكول سابا، المهم كبرنا واتعلمنا إن الدنيا أكبر من كده، ونهدى بقى ونحاول نبقى أسهل مع البشر عشان عايزين الليلة تعدى!
8- ما تبقاش على حد بايعك.. بيعاملك وحش.. مش مقدر تعبك.. إلخ.
النماذج دى تعيسة بتمتص من حياتك وقدرتك على الاستمرار فى لعبة الحياة وبتحتاج غالبًا عمر على عمرك!
عارفة إن الموضوع صعب، وعارفة إن رغبتك فى إثبات إنك ممكن تخلى فلان يتغير، فلان يحبك، فلان يهتم، فلان يشتغل معاك.. إلخ، رغبة جامحة جامحة بس صلى عالنبى فى قلبك كده ورانا بلاوى تانية محتاجين نخلصها.
اللى عايزك فى حياته هيبذل قدر من المجهود عشان ده يحصل، ولو ما عملش كده ماحصلش حاجة إنت مش محمد صلاح يعنى عدى عدى!
9- فى كل فرصة متاحة اخلق ذكريات مع البشر، خليهم يفتكروك بأى طريقة..
مهما كان قدامنا وقت لازم تعرف إن اللى فاضل مش كتير.
اضحك.. اقلش معاهم.. ادلق عليهم عصير..
اعمل كارثة..
خليك كما يقول الأمريكان «memorable»
عشان أما يخلص الوقت يبقى فيه فى مكانك أثر!
10- اضحك، حاول تضحك على الرغم من إن كل الظروف بتمنعك وبتزُقك عشان تبقى كئيب وبائس، حاول على قد ما تقدر إنك تفضل تضحك؛ لأن الضحكة غالبًا هى النفس الحقيقى اللى نقدر ناخده فى حياتنا بإرادتنا الحرة.