أصل الحكاية

الشعر أصل الحكاية
ومُبتدى الأفعال
والفكرة تُشبه فراشة
طبعها الترحال
كان حلمى أكتب قصيدة
تفوق جميع ماتقال
الحلم معاندنى
والشعر مش بالكيف
فى كلمة تنفع دوا
وكلمة تنفع سيف
وكلمة زى الرصاصة
وكلمة ريحها خفيف
الكلمة جايز تعيش
لو حد صدقها
الكلمة ممكن تموت
لو يوم يصيبها الزيف!
كان نفسى أعيش فى الصعيد
أسهر فى قاعدة سمر
واصحى على نيله
كان نفسى أكون صياد
بينام على قارب
وأراقب الملكوت
وأغزل خيوط ليلُه
كان نفسى أكون درويش
ويصطفينى الإمام
بإنى أرعى المقام
وأسرج قناديله
كان نفسى أشوف النبى
واسنلُه سيفه
طب مين فى دنيتنا
بيعيش على كِيفه؟