القاهرة : السبت 18 نوفمبر 2017
محمد الباز رئيس مجلسى الإدارة و التحرير
محمد العسيري رئيس التحرير التنفيذي
ads
ads
منوعات
الأربعاء 13/سبتمبر/2017 - 09:20 م

10 تعريفات لـ«الراجل النطع»

صورة أرشيفية
صورة أرشيفية
لوجى الحصري
dostor.org/1547331

كلمة نطع فى مجتمعنا هى دايمًا الكلمة المناسبة لوصف أى راجل مش على مزاجنا أو مش تمام، المبصباصاتى والكلامنجى والحورتجى وعديم المسئولية وعديم الدم كمان! كل واحدة مننا فى حياتها راجل واحد- ع الأقل- فيه صفة من دول، ورغم إن دى كلها صفات ملهاش علاقة إطلاقًا ببعض، إلا إن النطاعة بتجمع بينهم وبتعمل أحلى ميكس أو جايز أوحش ميكس! عشان كده سألنا مجموعة من البنات «مين هو الراجل النطع؟!» وتباينت الآراء.

أمنية سيد
الراجل النطع هو اللى بيعامل أمه وأخته وحش، وآخر الليل يبقى بيتحايل على حبيبته عشان تصالحه، واللى يحسسها إنى عورة وحاجة مستخبية مينفعش حد يشوفها بدافع الحب.

عليا تامر
اللى بيفضل قاعد قدام التليفزيون مابيعملش أى حاجة فى شغل البيت ومراته طبعًا طلعان عينيها ولما تيجى تعدى من قدام التليفزيون يزعقلها عشان مش شايف.

روزالين جاد
الراجل النطع ده هو الراجل غير المسئول، الاعتمادى واللى مبيعرفش يتصرف صح ومحتاج دايمًا حد معاه يوجهه ويقوله يعمل إيه فين وإمتى وإزاى.

نداء عبدالمسيح
راجل بطل يصرف على مراته لمجرد إنها اشتغلت أو قاطع أمه وأبوه عشان يرضى مراته أو اللى دايمًا مبيكونش معاه فكة وهو خارج مع بنت أو اللى يخلى مراته تنزل السوبر ماركت لوحدها.

لبنى ثابت
اللى بيكون شايف إن له حقوق كتير جدًا لمجرد إنه راجل وتفكيره دايمًا بيبقى رجعى وذكورى ومتخلف.

مريم سعد
الراجل النطع ده هو أى راجل بيخلى البنت تدفع الحساب لنفسها أو دايمًا كسول ووجوده زى قلته، يعنى لو خارج مع حبيبته، البنت هى اللى بتختار مكان الخروجة وبتجهزلها أو يحاسبلها.

مريم عادل
النطع ده راجل مالوش لازمة فى بيته أو فى الحياة عامة، دايمًا بيكون رامى الحِمل كله على مراته ومضيع فلوسه على حاجات ملهاش أى تلاتين لازمة.

ميرنا ياسر
أنا شايفة إن النطع ده خسارة كلمة «راجل» فيه أساسًا لأنه شخص عديم الإحساس والمسئولية، وبيبقى عالة ع اللى حواليه وع المجتمع كله.

رنا رشدى
النطع ده أى راجل شايف مراته دورها كله بيتمحور حوالين الطبخ والتنضيف والغسيل، بل وكمان مبيقبلش أبدًا فكرة إن مراته تكون أنجح منه.

رانيا مصطفى
الراجل النطع ده زيه بالظبط زى الكبايات اللى محطوطة فى النيش! مكتوب فى بطاقته ذكر ومحسوب ع الرجالة وكل حاجة، بس واقعيًا هو مالوش أى تلاتين لازمة.. ولا عزاء للرجال!

ads