قواعد "الشبحنة" العشرون للشباب والبنات.. خلصانة بشياكة

لو ماشي في الشارع، أو راكب وسيلة مواصلات ما، أو حتى قاعد بتتصفح الفيس بوك، وسمعت أو شاهدت بعض المصطلحات الغريبة زي: يا زميلي أو يا شقيق أو أخووو أو خلصانة بشياكة، متتفاجئش علشان دي بقت لغة العصر بين الشباب والفتيات وبيسموها "شبحنة".

نفض وطنش واحلق.. المصطلحات اللي كانت مش عاجبة ناس كتير خلاص راحت عليها، ويمكن كمان لو استخدمتها يتريقوا عليك.. لغة الشباب الجديدة "الشبحنة" بتبدأ من سن ١٥ وتمتد لسن ٣٠، وطبعًا لها شروط وأصول عشان توصل لمرحلة إنه يتقال عليك "شاب شبح" وأهمها:

١ـ استخدم في بوقك كلمة اخووويا ويا شقيقي ويا زميلي باستمرار، ودايمًا تخّن في صوتك.
٢ـ ﻻزم يكون لبسك مبهرج ويحبذ بنطلون ضيق وساقط، وتيشيرت شكله غريب، ويفضل لو عليه صورة غريبة، وكمان تلبس كاب ستريت، وهتتقمص الدور أكتر لو كاب فيه حاجات معدن.
٣ـ لازم تطول ضافرك الصغير عشان تبقي شبح أكتر.
٤ـ عليك بالخواتم والسلاسل الكبيرة، وياريت تخرّج السلسلة بره اللبس، دي من الأساسيات وبتدل على إنك "شبح ليفل عالي".
٥ـ وانت مع صحابك الأشباح، شغل دايمًا أغاني المهرجانات، واقعد ارقص في أى مكان.
٦ـ حاول تخلي دايمًا وسيلة مواصلاتك "المكنة الصيني"، وطول ما انت ماشي بيها اقعد ارفع حصان.
٧ـ خلي كلامك باستمرار عن المخدرات، وإنك بتقعد تشرب بالأيام، وتشرب المحيط، وميحصلكش حاجة.
٨ـ وانت بتتخانق، أول جملة تقولها "إنت منين يا شبح"، وبعدها "إحنا محدش يعرف يعمل معانا حاجة"، مع عوجة البوق وتشويحة بالإيد.
٩ـ دايمًا سقّط بنطلونك وبيّن ماركة ملابسك الداخلية.. عادي.
١٠ـ وانت ماشي مع المزّة بتاعتك فـ الشارع حط إيدك على كتفها.
١١ـ وانت ماشي فـ الشارع، خلي فيه تانية بسيطة فـ ركبتك، مع تنطيطة بسيطة في كل خطوة بتخلي ليك هيبة برضه.
١٢ـ أي حد يبصلك، وانت بتعمل حاجة من الحاجات الطبيعية اللي قولناها فوق دي، تخن صوتك وقوله "فيه حاجه يا شبح" هتلاقيه جاب ورا على طول.
١٣ـ خلي دايمًا حكاياتك وكلامك عن مغامراتك والحكومة دايمًا بتجري وراك، وازاي كنت إبراهيم الأبيض وهربت منهم.
١٤ـ بالنسبة للبنت دايمًا صباع الروج الأسود، وإزازة البرفيوم أبو ١٥ جنيه، ميفرقوش شنطتك أبدًا.
١٥ـ البنت الروشة والشبيحة هي اللي تاخد "سكرين شوتس" لأي شاب يعملها إضافة ع الفيس بوك وتسيحله.
١٦ـ دلوقتي بقي عادي جدًا إنك تسمع بنت بتشتم أفظع الشتايم، أو بتعمل أصوات غريبة من حنجرتها، ده الطبيعي دلوقتي، ومش مشكلتها بقي إنك لسه مش شبح ومتأخر.
١٧ـ الكوتشيهات الملونة الغريبة من طقوس الشبحنة.
١٨ـ لو انت فـ أي فرح، إقلع هدومك وارقص بالبنطلون بس، هتبان شبح أوي.
١٩ـ خلي دايمًا علبة السجاير الأحمر في إيدك، أو جيب قميصك، ولما حد يقولك عليها حامية، قوله "انت اللي فرفور".
٢٠ـ واوعي تنسى أهم حاجة، وهي استخدام كلمة "فشخ" و"فشيخ" ع الفاضي والمليان، وتنهي دايمًا كلامك بجملة "خلصانة بشياكة".