طموح وهدف

- بتشتغل؟
- أه الحمد لله.
- بتشتغل ايه؟
- موظف في .. (أي مكان)!
- طب وبعدين؟
- بعدين ايه؟!
- بعد 10- 15 سنة هتبقى ايه؟
- هترقى في شغلي ومرتبي هيزيد.
- وبعدين؟!
- بعدين ايه تاني؟!
- بعد عمر طويل هيبقى ايه الانجاز اللي عملته في حياتك الناس يفتكروك بيه وأنت مش موجود؟
- إزاي يعني؟ يعني ايه؟
- يعني انت بتشتغل في وظيفة -أياً كانت هي ايه- هتشتغل فيها كويس وتترقى ومرتبك هيزيد بس زيك زي أي واحد لما بعد عمر طويل تسيب الدنيا مش هتكون سبت فيها بصمة متتنسيش والناس تفتكرك بيها، هتتنسي واللي عملته في حياتك هيتنسي، زيك زي آلاف غيرك عاشوا وماتوا من غير ما يكون لهم تأثير في الدنيا وماتوا ومحدش بيفتكرهم!
- طب وايه يعني ما كل الناس كدة؟
- لا طبعاً مش كل الناس كدة، أمال الزعماء والعلماء والفنانين والأدباء دول كلهم ايه اللي لحد النهاردة الناس فاكرينهم وفي منهم اللي عدى على وفاتهم قرون!
- أيوة بس انا إنسان عادي مش زيهم!
- وهم يعني كانوا مولودين كدة؟! ما هم كمان كانوا ناس عاديين وفي منهم اللي كان أقل من العادي كمان وكان عندهم إعاقات بدنية وذهنية وظروف مادية واجتماعية متدهورة.
- طب وهو أنا لازم أبقى زيهم؟!
- لا طبعاً مش لازم، إذا أنت مش عايز غيرك هيعوز وهيقدر وهيوصل وهيبقى، وأنت هتعيش وتموت حد عادي، بعد ما تموت قرايبك وصحابك هيفتكروك سنة أو اتنين ويترحموا عليك وبعد كدة كل واحد هينشغل في حياته وهينسوك ومحدش هيفتكرك تاني!
- يعني هي كل الناس لازم تبقى مبدعة ومخترعة؟!
- لا طبعاً احنا برضه محتاجين الناس العادية الأمينة في شغلها لأن كل مبدع عشان شغله يطلع للنور والناس محتاج ناس عادية تساعده، ومش كل الناس أساساً عندها مواهب وقدرة على الإبداع، بس انا كلامي عن انك يبقى عندك موهبة ومبدع أصلاً وتدفن ده في روتين الوظيفة والحياة وتنسى موهبتك وحلمك!
- طب وأعمل ايه؟ ما هو أنا لو مشيت ورا حلمي وموهبتي وسبت وظيفتي مش هلاقي أكل!
- ومين قال تسيب وظيفتك؟ بس متبقاش هي منتهى طموحك، خليك في وظيفتك كمصدر دخل تصرف بيها على نفسك وعلى بيتك وتبقى وسيلة تقربك لحلمك مش تبعدك عنه، متنساش حلمك ومتدفنش موهبتك وتعيش وسط العايشين كدة وخلاص، عايش عشان تدور في طاحونة تصحى تروح شغلك وترجع تاكل وتشرب وتنام وتدور الأيام عليك وانت كدة وخلاص، تتجوز عشان خلاص كبرت وجه وقت جوازك، وتخلف وتدخل ولادك احسن مدرسة بس مش عشان هي أحسن مدرسة هتعلمهم صح إنما عشان هي أغلى مدرسة موجودة تتنمنظر بيها على اللي حواليك إنك دخلت ولادك فيها عشان ميبقاش في حد أحسن منهم.
ولازم يجيبوا أعلى الدرجات مش عشان هم فاهمين صح كل حاجة وحابين العلم ده، إنما أهم حاجة إنهم يصموا اللي في الكتب ويروحوا يحطوه في الامتحان ومش مهم يكونوا فاهمينه ولا مقتنعين بيه، وقصاد ده ممنوع عليهم يسألوا ويشغلوا مخهم ويفكروا في إجابات وبدائل تانية وإلا مش هياخدوا درجة السؤال. ونفضل جيل ورا جيل بنقتل إبداع ولادنا ومواهبهم وندفنها في روتين حياتنا اللي مش عايزين نغيره رغم إننا كنا بنتمرد عليه وإحنا صغيرين بس لما بنكبر بنخاف نبعد عنه وبنفذه بحذافيره في حياتنا ومع ولادنا.
وفي الآخر نرجع نشتكي إننا ليه مش متقدمين زي بلاد الغرب؛ لانهم باختصار مبيدفنوش نفسهم بأيديهم، لأن عقولهم هي المقياس مش الورق، ياريت نتعلم وياريت نبدع ومنوقفش عقولنا مادامت قادرة تشتغل!